RM12 riong pokigunoon
# montok monorina harata kakamot PGA id tindal om daat om montok koposodiaan koumoligan om PRU-14
KOTA KINABALU: Pasukan Gerakan Am (PGA) Sabah momoguno do kousinan kiikira RM12 riong montok tujuan monorina ngawi harata kaakmot (aset) id tindal om daat.
Potunud Koupisan Koumoligan Suang Pogun om Kotoonongan Tulun Ginumuan (KDNKA) Bukit Aman Datuk Seri Zulkifli Abdullah minoboros do ‘aset’ ih haro mositi torinaon montok tujuan koumoligan om koposodiaan tumoguang do pomilian tagayo ginumuan ontok toun tabantalan.
“Montok tujuan dilo, mokianu tokou doid Komontirian Suang Pogun tuh kaanu manahak do sakadai pomoruhangan montok monginsonong do harata kakamot ngawi ih pokigunoon kopio miagal bot-bot gunoon do PGA Polis Marin.
“Harata kakamot dilo pokigunoon kopio montok papanau karaja ngawi kaamung noh padsakaian tindal ihapatut insonongaan montok tujuan koumoligan montok koposodiaan tumoguang do pomilian tagayo ginumuan tiinu,” ka dau kumaa monunurat abar id kotumbuluian karaja dau id Longkod Upis Briged Pasukan Gerakan Am (PGA) Sabah, hiti koniab.
Mokianu nogi isio tuh papaharo do Batalion ko-21 id Kunak Tawau kaanu monoriuk kawagu do porinta.
Ka dau, sokiro ko ahal dilo kaanu papalantoi, om ino kaanu mongingkudi balanja posodia haro om porinta nga au minog papaatod tinimungan ponulungan mantad Semenanjung om nogi Sarawak doid Sabah.
Id ningkokoton suai, minoboros ih Zulkifli do Sukan SEA 2017 ih pinaharo id pogun diti kapanau miampai tososonong miampai aiso nunuunu kinantakan di au osonong.
“Gisom baino diti, aiso nunuunu notorimo tokou kopoilaan okitonan panangadan toiko kikoompitan miampai ahal dilo.
“Abaabayan sipoot ih pinaharo id piipiro pogun miagal Terengganu, Langkawi (Kedah) om Negeri Sembilan kapanau miampai tososonong.
“Pindalanan timpu Sukan SEA 2017 osonong kopio miampai aiso nunuunu ahal. Iti kaamung noh abaabayan ‘Equestrian’ id Terengganu ih naawi nogi koniab om tampat pialaan suai id labus Kuala Lumpur miagal Langkawi om Negeri Sembilan,” ka dau.
Minoboros Zulkifli do bogian dau posodia papanau do pingludaan koumoligan id pialatan pogun sompomogunan sabaagi laang montok popoingkawas do rontob koposodiaan tumoguang do nunu noopo kawo panangadan tangaraat id kawaigan Sabah.
“Ilo kaanu nogi doti monginsonong kamampuan tokou doid bogian ‘versatile’ idsuang ponguasaan sompori-pori doulu noh montok bogian PGA id pogun Sabah.
“Idsuang ahal dilo, tokou toririmo poingukab montok papanau do pingludaan songowian tinimungan koumoligan pogun suai sabaagi laang popoingkawas do ahal koumoligan doulu noh tumoguang do panangadan tinimungan taraat id kawaigan pogun diti mantad timpu doid iso timpu,” ka dau.
Nokotindapou nogi ih Pesuruhjaya Polis Sabah Datuk Ramli Din om Komander PGA Sabah Senior Asisten Komisioner Zainudian Samsu Hadi.