“Ahawon kosiwatan karaja ngawi ih pinosodia, ka Sapawi Kada koindamai momili karaja
SIPITANG: Pinosorou di Puru Parlimen Sipitang Datuk Sapawi Ahmad o mogium ngawi karaja doulu noh id pogun diti tuh au momili pakarajaan, katapi mositi mamagahau kosiwatan karaja ngawi ih pinosodia.
Minoboros isio do koulalahon irad dilo mositi poindisanon montok momogonop do kouhangan om kogunoon tikid timpu pomorunan om komponi nogi koponulung popotounda pogun doid rontob di lobi koburu.
Maya Abaabayan Karaja Kabansaan 2.0 2017 ih pinanjur do Koupisan Winakas Karaja Sabah (JTKS), ilo okitonan kaanu monulung tinimungan mogium ngawi karaja kapaganu do pakarajaan di kangaam miampai kinodimpotan diolo.
“Maya abaabayan diti, goduo-duo bogian kaanu doti asil montok kapaganu do pakarajaan kangaam miampai kobulihan diolo om montok bogian touki nopo nga, kaanu iyolo winakas karaja di haro kobulihan.
“Pisokodungan bogian touki maya do abaabayan diti nogi kaanu nogi monulung porinta montok mongingkudi do ginumu aiso karaja id pogun diti,” ka disio.
Noboros disio ahal dilo ontok romuto kalaaps pinotimpuun do Abaabayan Karaja Kabansaan 2.0 2017 (Train Ride Sabah) id Dewan Masyarakat Sipitang, koniab.
Id ahal dilo, Sapawi ih nogi Potunud Yayasan Sabah minomisunud do Tinimungan Yayasan Sabah nogi umampai poposodia do kosiwatan pakarajaan kumaa tulun ngawi id pogun diti.
Ka disio, ilo otopot kopio soira porinta pinoposodia do Longkod Kakamot Tinunturu Sabah (PKS) id Keningau ih kiguno montok manahak pingludaan pamansaian kakamot tinunturu om manahak kosiwatan kumaa mongindapu papadagang do asil diolo.
“MiampaipinonuridonganPKS,kosiwatan pakarajaan kawawagu om kinalabaian ekonomi nakaharo noh id labus kakadaian om otopot kopio lobi 20,000 tulun nakaanu asil mantad abaabayan kakamot tinunturu (kraftangan) ih pinanjur do Tinimungan Yayasan Sabah.
“Miampai owonsoi nopo Longkod Konvensyen Sompomogunan Sabah (SICC) dilo tiinu, kapanahak nogi doti ilo do kosiwatan pakarajaan wagu kumaa lobi 10,000 tulun id pogun diti,” ka disio.