Tumaru ABR okon ahal mainan: Sazali
KOTA KINABALU: Pakakaraja tulun ginumuan ih pinaharo do Tumaru Koidu Susuap (IBR) pinosorou tuh au monondos dilo sabaagi ahal mainan.
Potunud Tinan Monorina Pomunsaan Susuap Malaysia (SPRM) Sabah Datuk Sazali Salbi minoboros do laang ih pinointutun do bogian dau dilo mositi do iloon totootopot om gunoon miampai noponu tonggungan.
“Nung nakataru nodi, kada tokou nodi pomonsoi ahal susuap toiko kasala momoguno kuasa sabap nakabatos tokou noh montok tinan sondiri, boyoon om tulun ngawi posorili kaamung noh ih Minamangun.
“Nga, kakaal haro wookon upisor ih tuminaru mantad kabang noopo miampai monorimo dilo miampai totootopot om iti ih posotolon tokou sabap ilo kopomiraag doti do korikohonon tinan sondiri kaamung noh agensi dilo,” ka dau.
Noboros disio ahal dilo ontok romuto id Abaabayan Tumaru om Suminain do IBR Pakakaraja Universiti Malaysia Sabah (UMS) hiti koniab.
Kokomoi ningkokoton suai, noboros di Sazali do duo tulun maan tahano sumusuut 12 kes pakakaraja tulun ginumuan di nakaanu pinopotoguang doid kuut di kawawagu.
Ka dau, kakaal SPRM montok popoindalan koponimungan tantda totopot om koilaan kokomoi duo dulun dilo pogului ontokon laang ponugutan.
Suai ko ilo, angatan disio o tulun ginumuan poporijisto tinan sabaagi tambalut ‘Gerakan Revolusi Anti Rasuah’ (Gerah) ih wagu poh pinotimpuun di ontok 8 Mei nakatalib.
Ka dau, ‘revolusi’ dilo ih kinomi ‘Non-Violence’ om ‘Non-Political’ pinaharo montok popoingkawas do kopurimanan om karalagaan id pialatan tulun ngawi kokomoi koimaan taraat susuap om kasala momoguno kuasa.
“Koporijistaran sabaagi puru Gerah diti okon noopo ponokotanda do ‘komitmen’ sosongulun montok miwoyo SPRM momunso ahal susuap katapi nogi ponoko mato om tolingo SPRM montok manahak do ruputan om kopoilaan.
“Sokodung om kopoompitan tulun ngawi kiguno kopio montok mogiwowoyo ngawi momunso koimaan taraat susuap om kasala momoguno kuasa suai ko poposiliu dilo sabaagi sangod numbur iso pogun,” ka dau.
Kokomoi abaabayan dilo, nayarou di Sazali do poingukab o pakakaraja ngawi UMS suai mantad sumiliu iso soromin sokodung potilombus mantad tinan dilo montok papatantu do ponorinaan om kotorinaan koidu kotoguang do koimaan taraat susuap.
“UMS nopo nga agensi ko 51 om nosiliu Institut Ponginabasan Takawas Tulun Ginumuan (IPTA) koiso id Sabah ih pinapaharo do tumaru IBR.
“Komitmen diti gatangon kopio do SPRM om tumilombus tokou misokodung miampai UMS montok popoingkawas kopongipopan susuap om kasala momoguno kuasa montok papanaon miampai totootopot mantad kawas ponorinaan gisom suriba kaamung noh susumikul id longkod ponginabasan takawas diti,” ka dau.
Namot dilo, Timbang Canselor UMS Profesor Dr. D Kamarudin D Mudin minoboros do soosomok 200 tulun ih nokotindapou kaampai mantad Upisor Wanan om pakakaraja ‘akademik’ om okon ‘akademik’ pinapaharo do koponguhanan tumaru dilo.
Ka dau, ilo otopot ponokotanda do UMS toririmo papaharo do pisokodungan miampai SPRM montok papawakas om poposotol do ahal pironitan potitikid pakakaraja mooi do au kowudsu idsuang koimaan taraat susuap om kasala momoguno kuasa.
“Koimaan taraat susuap diti sokiro ko kotilombus kotongkop kontodonon doti do sakadai kousinan mantad porinta kaamung noh koundangan ih posodia haro au kaanu papanau miampai tososonong miagal ih pokilansanan.
“Mantad dilo, otumbayaan oku do nung gatang pironitan diti poompiton kumaa toinsanan upisor kaamung noh susumikul UMS sondiri, tantu noh do tinan dilo kaanu poposimban kumaa Universiti Industri 4.0 miampai lobi osikap,” ka dau.