APM Sabah mokirikot 180,000 puru ontok koimpupuson toun diti
KOTA KINABALU: Tinimungan Gugumaga Tulun Ginumuan Malaysia (APM) mokiririkot kiginumu 180,000 puru koinsasanai id Sabah ontok koimpupuson toun diti.
Ponowoli Naamot Potunud APM Pogun Sabah Kolonel (PA) Mohd Izaimi Md Daud minoboros do pamalanan pomoruhangan puru diti nopo nga wookon mantad laang montok momohusi kopokionuon Montiri id Koupisan Luguan Montiri Datuk Seri Dr Shahidan Kassim.
“Kopokionuon diti kaamung no mantad momonsoi kapganu do puru kiginumu duo riong tulun gisom kowiyon toun diti sabaagi iso mantad panalasaian kobolingkangan puru ih kakaal au poh kosukup.
“Pomoruhangan diti lobi koponuhu doid kapamaganuan puru ‘sukarelawan’ wagu montok papatantu do haro o bogian tokou ih kaanu momonsoi pomohusi tosikap soira antakan o nunu noopo kaagaban,” ka dau.
Noboros disio ahal dilo id pitimbungakan abar kopinamot Abaabayan Kapanaakan Karaja Potunud APM Sabah id padang kawad Universiti Malaysia Sabah (UMS), koniab.
Id abaabayan dilo, Izaimi ruminamit karaja Potunud APM Sabah mantad Kolonel Mulliadi Al-Hamdi Ladin ih pogului diti minongigit karaja dilo mantad podi 2011.
Moboros kokomoi pamalanan dilo, minoboros Izaimi do kapamaganuan ‘sukarelawan’ wagu id suang APM kaanu momo’ia om paparagat do tulun ngawi songkoiyonon osikap ontok antakan kaagaban.
“Miampai haro nopo bogian di kaanu maganu laang tosikap montok momunso kaagaban kaamung noh nunu noopo kaantakan om kaantakan taraat, ginumu munggui ih kotoguang doti kosindualan om rontob kapataion kaanu mongingkudi miampai lobi kiwaya.
“Koyuon diti nogi papatantu do koiyonon posorili om bogian poingiyon id doros otumbayaan do kaanu mongumolig miampai haro o puru ih pinoiyon id potitikid koiyonon,” ka dau.
Isio poingkuro poh nga minoboros do bogian dau baino diti nogi masaon id kopoindalanan pangapalaian montok pomoruhangan puru maya do Koupisan Kotorinaan Tulun Ginumuan (JPA).
“Piipiro karata karaja masaon pootodon doid bogian JPA tuh kaanu momoruhan pakaraja ngawi kipangkat id bogian watas om pogun montok kokosongan kikoompitan,” ka dau.
Namot dilo ka dau, toinsanan puru nokosodia noh montok tumoguang do liud ontok kowiyon toun sundung pia bogian dau baino diti kotoguang kaantaban ‘logistik’.
“Kotoguang tokou okudian padsakaian tawagat kaamung noh lori duo om tolu tan di obuli gumura sumaap liud om korita 4WD ih aiso id toinsanan watas id Sabah.
“Pangapalaian ponguhupan kopomoruhangan ‘logistik’ nowonsoi tokou noh om magandad tokou noopodoidkasanganuandiharomantadbogiansawat,” ka dau.