Arifin: Injin Umno, BN Kimanis poinsodia tumoguang PRU-14
MEMBAKUT: Kumoduo Boyoon Bogian Umno Kimanis, Datuk Arifin Arif minoboros do injin Umno om Barisan Nasional (BN) id gogian disio baino id koyuon poinsodia montok tumoguang Pomilian Tagayo Ginumuan (PRU) ko-14.
Pinatarang disio do injin Umno om BN id Kimanis’kuminaraja’ lobi osikap kalapas PRU nakatalib (PRU-13) om baino tumilombus manahak karaja kumaa koinsanai rayat miampai au mundorong.
“Mantad timpu doid iso timpu tumilombus tokou papawakas injin tokou id bogian gamut sakot. Montok Longkod Watas Mongundi (PDM) nopo, nakapanau tokou noh om baino diti magandad tokou noopo do ‘semboyan’ pouniyon montok tokou papanau karaja,” ka disio.
Noboros disio ahal dilo ontok romuto do monunurat abar kalapas pinotimpuun do ‘Majlis Kebitaraan Seni Silat SeWarJad’ id Sikul Pintangaan Kabansaan (SMK) Membakut II, koniab.
Pinokianu Arifin minongomi kokomoi do kopoilaan Porosiden Umno ih nogi Luguan Montiri ih minoboros do poluntanon doti Pitimungan Tagayo Umno kowiyon toun diti sokiro ko PRU pohoroon ontok kotimpuunon Disember.
Noboros di Najib ilo kalapas pinoboros do timpu Pitimungan Tagayo Umno ko17 ih pohoroon ontok 5 om 9 Disember diti kalapas minomorikohon do Miting Tinan Takawas Umno di tadau Kaapat nakatalib.
Id ningkokoton suai, Arifin ih nogi Panakadai Montiri Doid Boyoon Montiri mongunsub do susumikul ngawi montok mimparagat idsuang nunu noopo kaparagatan sipoot montok kogunoon susumikul dilo sondiri.
Minaganu isio suntu do kuntau di okitonan osonong kopio montok susumikul ngawi sabap ilo kaanu nogi popoingkawas do koulalahon ginawo om monulung momonsoi kotulunan sompori-pori. Mantad dilo ka disio, kobulihan om toilalaan di nabalajaran poompus kuntau kangaam kopio porolomon mooi do kobulihan di nasanganu dilo kaanu mogowit doid bogian di lobi akawas om kanu nogi popoinggayo ngaran pogun (Sabah) om Malaysia nogi.