‘Juruteknik’ kiharo sinjata ontok minangasou nadanda

KOTA KINABALU: Songulun ‘jurutkenik’ ih nawuk kiharo sinjata ontok uminampai minangasou nadanda kiginumu RM3,500 mantad Kuut Maistret hiti koniab.

Gelvin Moll, 24, minangakun kisala tumanud Seksyen 148 Kanun Koinggoritan, kalapas pinanandasan binasa kumaa dau id toguang Majistret Stephanie Sherron Abbie.

Ukuman di pinoobi, kojiil solinaid timpu limo toun toiko danda, toiko miampai goduo-duo dilo.

Natandasan noilaan uminampai id pinangasahan om kiharo galas soromin di obuli gunoon sabaagi sinjata montok manangod.

Kasalaan dilo winonsoi di ontok 9 Julai pialatan jam 3 minsusuab gisom jam 4 minsusuab, id iso premis Stone Cafe, Kepayan Point, Ralan Pintas, Penampang.

Nung au kaanu mambayar danda dilo, ponuhuan do kuut ih Gelvin ontokon jiil solinaid timpu walu wulan.

Asil pinonoriukan, ontok munggui minomorisi kafe, kiharo sontimungan tombului masaon magawi do tiinumon tokodou.

Tigog go nantakan pisingkiwalan kabang pialatan diolo, mininggisom munggui minonginsamod do koyuon. Nga sabap au nasantaban ginawo sabap suminampalag, tinimungan dino nokomoi minomobog munggui miampai minomoguno do kakamot kokodou miagal galas om kayu snooker.

Munggui pinaatod doid bogian kaagaban lamin pongusapan Queen Elizabeth om nakakandai nosindualan id bogian tulu, sabap binobog kakamot okodou.