Ponuu’an kumuung id Esszone pinotihombus gisom 11 Sept: Ramli
KOTA KINABALU: Ponuu’an kumuung id boogizan kavaigan tuu uvang poinsuvang Zon Oumohig Kohisa’on Sabah (Esszone) ih opupusan suvab (baino) pinotihombus gisom 11 September, ka di Pesuruhjaya Polis Sabah Datuk Ramli Din (Gambal).
Minoboos isido, miampai kopotihombusan dio, izioho ih poingizon id boogizan dino nokomoi pokionuon kivaa id suvang hamin om au pakavasaon sumuvang do boogizan kavaigan dino piahatan jam 6 sosodopon gisom jam 6 kosuvabon poompus timpu dino.
“Tuhun suvai au pakavasaon sumuvang toi kiva id boogizan ih pinoimagon piahatan jam 6 gisom jam 6 kosuvabon ontok tadau di pinoboos,” ka disido id kopoihaan doiti koniab.
Minoboos isido do ponuu’an kumuung dino pinotihombus montok papatantu do boogizan kavaigan dino nokomoi au osuvang di tuhun talaat ih mongundoonok koumohigan mononoizuk sompomogunan ih papanau do ponoizukan om tutumombuhui songkosuvazan ih tumombuhui pulou ngavi podtuongisan.
Minoboos zi Ramli, tumanud do kopoihaan, tinimungan militan Abu Sayyaf om izioho ih papanau do kapaagatan manazang montok kapaganu do usin pokihapusan mantad kaabatan Filipina kakaal kuminam sumuang aiso kasagaan montok monoodo panazangan om koimaan talaat mozo pivohitan.
Ka disido ponu’an kumuung dino nogi montok papasanang do popogiotkuasa om pongintongan nokomoi kapapanaan bot om kopoimbuhai do tivou oumohig om kotumbozo doid mongindapu ‘chalet’ om monginsada miampai koikotan kapal puu koumohigan om pozoihi boogizan dosido.
“Manaak zou nogi kuasa doid saaviavi Huguan Pulis Uvang id uvang Esszone montok papahabus do poomit doid mangapalai ih otoimo montok tuduvan kapaagatan ponginsadaan toi kivaa kogunoon koposonsog montok maza boogizan ponuu’an kumuung,” ka disido. -Bernama