Kada sugio pulitik pitinaruan idsuang UMNO: Nasir

TAWAU: Minanahak kopoingatan ih Boyoon UMNO Bogian Kalabakan Datuk Seri Abdul Ghapur Salleh kumaa koisaan tinaru tuh au monugi pulitik pitinaruan idsuang parti ‘keramat’ UMNO hiti.

Isio ih nogi Puru Parlimen Kalabakan minoboros do pulitik pitinaruan nung au ipopon kopomiraag goti do pisompuruan idsuang parti om nogi pironitan tulun ngawi togumu id pogun diti.

“Manahak oku kopoingatan kada sugio sunduan pitinaruan sabap idsuang UMNO padamaan dilo sabap agama, bansa om pogun sondiri noopo okon okitonan pitinaruan.

“Idsuang UMNO aiso Bugis, aiso Jawa, aiso Bajau om tokou noh puru UMNO ih mogisusuai bansa katapi iso agama,” ka disio ontok minanahak boboroson pinotimpuun do pitimbungakan lalansanon UMNO Kalabakan doros hiti, koniab.

Tumanud dau, potitikid puru apatut monokiala kada pogibababak om tumilombus manahak sokodung kumaa kopomuruanan parti pogun om longkod.

“Nokuro timpu umbak tokou muhang alanan kapten (Boyoon Montiri Sabah Datuk Seri Musa Aman) tokou nga otopot nopo isio minomogowit dotokou doid iso tiyonon di asanang om koburu,” ka disio.

Minamangkis nogi isio kotumbayanan id doumbangan kiikira 2,000 lalansanon UMNO ih nokorikot id pitimbungakan do 23 mantad 25 tirikohon parlimen id pogun diti tantu alantoi do calon UMNO.

Ka disio, ogumu kotundaan nowit UMNO doid pogun diti om nung haro kokurangan posunudon kumaa momuruan om tantu noh do mogium laang tosisikap toiko odomut. Bernama