Lobi RM373 riong montok kotundunan 503,317 susumikul Sabah: Alias Ahmad
KOTA KINABALU: Porinta pinopoobi do lobi RM373 riong maya Poruntukan Sakadai Koposikulan Komontirian Balajaran Malaysia (KPM) kumaa 503,317 susumikul id Sabah.
Boyoon Monunurat KPM Datuk Seri Alias Ahmad minoboros do ilo nopo nga pialatan laang tosonong KPM au mongoling do kotundunan rayat miampai manahak do ponompuanan miirad nopo kumaa toinsanan susumikul idsuang pogun.
“Sakadai koposikulan diti nopibahagi kumaa tolu bogian tagayo, ilo nopo nga sakadai koinsasanai kiginumu RM89 riong ih kopoompit do Sakadai Baraian Tambaan Koposikulan om Baraian Kokurikulum Sikul.
“Kalapas dilo sakadai miagal Sakadai Pamalanan Taakanan Pomoruhangan (RMT) 1Malaysia, Sikulasip Tokoodo Pisompuruan om Sikulasip Sipoot miampai ginumu koinsasanai RM246 riong om sakadai ‘one off’ ilo nopo nga Sakadai Poimbida Kotimpuunon Koposikulan 1Malaysia om Baucer Buuk 1Malaysia ih kigatang RM38 riong.
“Sakadai ngawi diti pataakon montok papatantu do tanak ngawi ih kiharo id 1,293 sikulan pointongkop Sabah kapaganu kosiwatan om koposuangan balajaran di tosonong kotopong pogun nokoburu,” ka dau.
Noboros disio ahal dilo ontok minanahakboborosonpinotimpuun do Abaabayan Tumongkop Balajaran 2017 KPM hiti koniab.
Kawagu dau KPM nogi toririmo kikosianan montok papatantu do linominon sikul oumolig om obuli gunoon montok timpu pambalajaran susumikul miampai maganu kokiraan kogunoon toinsanan bogian.
“Mantad ahal poruntukan kotundaan, manahak nogi Sabah do pongintongan di kangaam kopio mantad Koporintaan Pisompuruan.
“Idsuang Abaabayan Malaysia Ko11 (RMK11), kiginumu 43 projek wagu om 147 projek oputan pinolulus miampai kos koinsasanai kigatang RM3.79 bilion.
“Mantad ginumu dilo, pamahagian poruntukan kiginumu RM40 riong nakatahak noh ontok toun diti montok pongumbasian 30 tinan sikulan nangaraag pointongkop Sabah miagal ih pinoboros di Luguan Montiri Datuk Seri Najib Tun Razak id pason bajet 2017,” ka dau.
Tumanud dau noilaan noh do komontirian do kogumuo sikulan nangaraag noh nakatalib ginumu dino nokomoi id Sabah nga koponguhanan pongumbasian nopo nga tumanud doid poruntukan di pinolulus.
“KPM minggisom miampai laang di lobi aparagat montok papatantu do ‘infrastruktur’ om kounalan ngawi id sikul toririmo id koyuon ‘kondusif’ montok monokodung kopponudukan om pambalajaran,” ka dau.
Namot dilo, ka dau mantad ahal kotundunan pakakaraja ngawi mongingia, nogian ponorinaan poingkakawas KPM karati kopio om toririmo kikosianan kokomoi do kobolingkangan kogumuan mongingia ih kotoguang miampai mogisusuai ahal om kaantaban.
“Mantad dilo, kapangalanan mongingia insan sontoun nakapanau noh tuminimpuun toun diti miampai kinookunan kapangalanan mongingia miampai mogipapangaan tuminimpuun Jun gisom Januari 2018.
“Kriteria kinookunan kapangalanan mongingia pinatantu miampai manahak kopoguluonan kumaa mongingia oinggorit ginawo tumanud do ‘merit’, katanud miampai gaab ‘Dasar 90:10’ id Sabah om Sarawak.
“Kogumu mongingia ih mokianu tumanud pasangan mantad Sabah nopo nga kiginumu 360 aplikisin montok kapangalanan pialatan pogun toiko bogian montok timpu Jun sikul pintangan,” ka dau.
Kawagu dau mantad ginumu aplikisin dilo kiginumu 57 aplikisin pinolulus.
Ka disio noolu ginumu aplikisin di ao poh nokolulus maan timbango montok timpu rumikot.
“Toinsanan laang diti alansan kaanu manalasai do kobolingkangan mongingia ngawi, kagu nga KPM toririmo minggisom popoburu do pongumbasian montok papatantu do kotundunan tinimungan mongingia au otolikudan,” ka dau.
Nokotindapou nogi ih Potunud Balajaran Pogun Sabah (JPNS) Datuk Maimunah Suhaibul.