Mogowit panangadan tagayo
# Pamagasuan tolosok id bogian pomogompian tomposion lalang
TONGOD: Kaparagatan pamagasuan tolosok kotilombus oisliu panangadan tagayo kopio kumaa kopomogompian tomposion (tayam) lalang id Sabah, tumanud songulun tabaal ih minoboros do kunsi tagayo montok mongorulan ahal diti nga popogirot do kopogirotankuasa id posorili ‘zon penampan’.
“Sokiro ko kaparagatan pamagasuan tolosok diti au potingkodon, kogumuo koinsasanai ‘spesies’ tomposion lalang ih tingoligon om undoronok id pogun diti koingkudi doti idsuang timpu toruhai,” ka di Boyoon Eksekutif Sabah Environmental Trust Dr Rahimatsah Amat kumaa Bernama.
Isio nopo nga pialatan 100 tulun ih minagnu bogian id ‘ekspedisi’ 10 tadau id batu Timbang, iso koiyonon id barat daya Bogian Pomogompian Kanyon Imbak (ICCA) id tanga Sabah, di kawawagu.
Ekspedisi dilo nobian di Petronas id suriba Pisokodungan Bogian Pomogompian Kanyon Imbak Yayasan Sabah-Petronas.
Minoboros Rahimatsah do kiguno kopio montok popoingkawas do kotindapouan upisor popogirotkuasa id poompus ‘zon penampan’ om mongingkudi do ponginaman mantad mamagasu tolosok montok sumuang miamapi aiso kasagaan bogian pomogompian dilo.
“Sokiro ko obuli tokou momonsoi irad dilo, kanu tokou doti popoingkudi do kosuangon (mamagasu tolosok) doid bogian pomogompian,” ka dau.
Ahal dilo nopo nga pialatan di intongan ontok ‘ekspedisi’ dilo id bogian tokodou ICCA, om talun okurout misampaping dilo, om papmpang batu kapur id Talun Popion Batu Timbang.
Karaja ngawi tutubpoon pinapatantu do tumanud panamangan om pongintongan tosikap mantad pakakaraja ICCA do bogian Batu Timbang osiliu ‘hot spot’ montok mamagasu tolosok.
Minoboros Rahimatsah do korikotan tomposion lalang di okuudi id bogian tokodou dilo sabap doti do kaparagatan pamagasuan tolosok ih nokotongkop. Kiharo nogi waya ‘grafiti’ id guas ngawi, kawagu dau.
“Panangadan poinggagayo montok ICCA, toiko toinsanan bogian pomogompian id Sabah miagal Maliau Basin om Lembah Danum nopo nga kaparagatan pamagasuan tolosok,” ka dau.
Pialatan kinonuan ontok ‘ekspedisi’ dilo ih tuminimpuun ontok 16 Ogos nakatalib, nopo nga kinokitonan tapak kakod Tambadau toiko Banteng (sapi lalang) ih tingoligon om walu ‘spesies’ kosunion pongolumisan, Begonia. Apat mantad dilo nopo nga wagu poh id kaganaan sains.
Minampayat ‘ekspedisi’ dilo kaampai mantad Koupisan Katalunan Sabah, Yayasan Sabah, Koupisan Tomposion Lalang Sabah, TamanTaman Sabah, Longkod Biodiversiti Sabah om Muzium Sabah, om piipiro universiti om kotinanan okon porinta (NGO) miagal WWF Malaysia, Program Pemuliharaan Orangutan HUTAN-Kinabatangan om Sabah Environmental Trust.
Kiginumu 13 monunurat abar mantad mogisusuai tinan media om lansanon mantad Tourism Malaysia ih nowit kuminakap doid ICCA kopinamot miampai ‘ekspedisi’ dilo, kikosiwatan minongintong karaja ngawi wonsoyon do saintis om monoriuk ontok minaya talun om kotoguang miampai koyuon au osonong.
‘Ekspedisi saintifik 2017’ dilo kitujuan maganu do kopoilaan ‘saintifik’ doulu noh kikoompitan ‘biodiversiti’, ‘ciri-ciri fizikal’, ponokiaalitan om panangadan id bogian dilo.
Batu Timbang nopo nga iso mantad piipiro tiyonon id ICCA ih pinoobi montok ponuridongan stesen ponoriukan miagal ih pinoboros idsuang ‘Pelan Pengurusan Strategik’ ICCA 2014-2023.
Iti popomilo doti do ponorinaan opurokis id ‘zon penampan’ ICCA ih kiasil om papatantu do kobulihan pisokodungan miampai tulun ngawi posorili montok popoingkudi do panangadan doid bogian tokodou ICCA.
Iso kagu tukuan ‘zon penampan ih kogumuan dilo talun naraag, nopo nga montok papaharo do piromutan pialatan bogian tingoligon om bogian lobi alaab ih tuminutuk dilo.
Petronas om Yayasan Sabah pinopoboros do pisokodungan diolo montok momogompi ICCA ontok 2011, ih kopoompit do ponuridongan Longkod Pambalajaran Kanyon Imbak kigatang RM77 riong ih nopongo noh. -Bernama