Taman-Taman Sabah minanganjur ‘Kursus Renjer Kehormat’
KENINGAU: Taman-Taman Sabah minanganjur ‘Kursus Renjer Kehormat Taman’ 2017/2020 solinaid apat tadau, hiti.
Kursus dilo kopoompit do kiginumu 53 Renjer Kehormat (Renjer Tapantang) ih kaampai mantad lansanon tinimungan Taman Tun Mustapha, lansanon tinimungan mongindapu ‘Homestay Eko Pelancongan’ id posorili Taman Kinabalu om Taman Banjaran Crocker.
Pinanganjuran abaabayan dilo nopo nga kopongoputan mantad ‘Program Renjer Kehormat Taman’ 2014/2017 miampai piipiro pinongumbasian miagal papasanang do laang pambaraian elaun om karaja ngawi, palantikan ‘Renjer Kehormat Taman’ mantad lansanon mogigion posorili koiyonon ih masaon popoburu do eko-ponombuluian om palantikan lansanon mantad Zon Kogunaan Mogigion (CUZ) Kg Ulu Senagang-Mongool Baru.
Poompus kursus dilo, pinoompit o minampayat ngawi miampai mogisusuai kawo pingludaan ih kopoompit do toilalaan minampayat kokomoi gaab om kogunoon Taman-Taman Sabah, Enakmen Taman 1984, kopogisuaian koinsasanai kosunion om tayam om nogi popointalang kokomoi mogisusuai ahal koiyonon id alaab.
Pinointarang nogi o minampayat ngawi do kokomoi kopomogunaan GPS, kompas, kapatantuan palan grid om poingkuro momonsoi ruputan om iso timpu pikunsian toilalaan songowian Koupisan Tomposion Lalang om Koisaan Popotunud Ralan Nuluw Nabalu.
Abaabayan koponutuban om kinapanakahan surat palantikan ‘Renjer Kehormat Taman’ pinababai di Ponorikohon Kotinanan Poingigit Kuasa Taman-Taman Sabah Dato’ Sri Tengku Zainal Adlin Tengku Mahamood di tadau Kolimo nakatalib.