Kopunsaan boros tinaru Kadazandusun nopo nga mantad no do...
do boros tinaru Kadazandusun nopo nga mantad no do au o tinaru dilo moboros boros tinaru; au diolo posuraton id buuk o boros tinaru; om haro boros suai i poingalib korohian tulun Kadazandusun do moboros.
Kobungou koiso haro katapatan tu kogumuan tulun Kadazandusun timpu baino do au moboros boros tinaru. Korohian diolo do moboros om poposurat boros Malaya id buuk, id whatsapp om facebook, id walai sondiri kumaa tanak, id walai panambayangan om id sikulan.
Kobungou koduo nga haro o katapatan tu do naamot au moboros o tulun Kadazandusun, aiso nogi kosiwatan diolo poposurat boros tinaru id buuk. Nga iri nopo buuk Panambayangan Kristian, nadalin no daa id boros Kadazandusun di toun soribu siyam naatus onom naapadan (1960an) po nga gisom timpu bainoau do tulun Kadazandusun gunoon mulong po do oinsanan yolo tumimung id walai panambayangan id labus kakadayan..
Kobungou kotolu nogi nga agayo o katapatan. Timpu baino, boros Malaya/ Indonesia o boros kagaratan boroson do ginumuan tulun Kadazandusun id labus kakadayan om id kakadayan, mamaso monondig tadau kaamatan, manaandak kinouliton tadau piniangayan om kinosusuon, om do sumambayang id walai Kinorohingan id labus kakadayan mulong po do atus paratus yolo tulun Kadazandusun do pointimung.
Koposion do boros tinaru nopo nga minagal-agal do ralan. Tumalup i ralan nung au no opinwayaan do tulun. Au o tulun Kadazandusun maya di iso ralan mantad no do haro oh ralan suai do wayaan diolo miampai tulun ginumuan suai.Au o tulun Kadazandusun moboros do boros tina (mother tongue) mantad no do alo boros Malaya/Indonesia boroson diolo miampai tinaru suai.
Koligaganan tagayo tulun Kadazandusun do atagakan ngaran tinaru nung au atampasi o boros tinaru tu boros o pogintutunan do tinaru. Iso kaantakan ii kootus om au milo diolo olimon tikid tadau id kopoposion diolo iri no tu soira mokiwonsoi yolo kaad kointutunan wagu, hiri do uhoton yolo di kerani do nunu ngaran tinaru diolo. Miagal nogi di tu soira mokianu yolo pongobian mantad porinta miagal ko subsidi toi ko scholarship, hiri do opurimanan diolo o koponsolon (kogunoon tagayo) do poposurat ngaran tinaru tu mokianu yolo pongobian tosonong mantad porinta. Porinta manahak diolo do pongobian poimbida (special) sabaagi tulun sandad momogun (native people) id pogun diti. Boros Kadazandusun, sundung po do au po milo gunoon id pototongkop pogun Malaysia, do naamot diti, gunoon nopo daa do somboros (sanganu) sabaagi boros pogintutunan tinaru (ethnic identity) id pogialatan tulun tinaru sondiri. Ogumu nogi tulun suai koobi mongondom do insan tadau opunso iti boros Kadazandusun. Nokuro ma? Koiso, mantad no do au o komolohingan Kadazandusun moboros boros tinaru kumaa tanganak id walai paganakan sondiri. Koduo, id gana porobuaton om id sikulan, poinrolot o tulun Kadazandusun do tinaru suai i moboros noopo do boros Malaya/ Indonesia om susuai po. Kotolu, okudi tulun Kadazandusun i arahi toi ko koilo kopio om oupus moboros boros tinaru.