Tonudon ningkokoton om ponginwaguan wagu id ponudukan Boros Inggeris: Musa
KOTA KINABALU: Pokionuon di Boyoon Montiri Datuk Seri Musa Aman o puru longkod ponginabasan takawas (akademik) om mongingia mooi katanud do koingkokoton om ponginwaguan kawawagu montok balajaran boros Inggeris montok papatantu do boros dilo kaanu monuduk miampai kiwaya.
Minoboros Musa do montok tumilombus idsuang koponudukan boros sompomogunan, iyolo ih nokoompit idsuang boros boros sompomogunan mositi mogium ralan om kaanu do toilalaan ih kikompitan montok poposiliu do balajaran dilo kagayat kumaa susumikul ngawi.
“Sundung pia yoho okon songulun monunuduk, (nga) otumbayaan oku do koponudukan boros Inggeris momoguno do sosongulun dilo osiliu aparagat om haro katabayan poposiliu do balajaran dilo kagayat doulu noh id suang kaganaan hinonggo boros diti au gunoon miampai kalaab.
Katabayan montok mogiboboros miampai kiwaya idsuang boros Inggeris nopo nga kiguno id pomogunan miampai aiso piwolitan, ih popomilo dotokou mogiboboros miampai tinimungan ‘global’ maya do mogisusuai ‘platform’ kaamung noh internet,” ka dau id abaabayan pitimbungakan ko-26 Koisaan Ponudukan Boros Inggeris Malaysia (MELTA) hiti koniab.
Teks apason Musa pinababai di Montiri Kotundaan Rayat om Ahal Momoguno pogun Datuk Jainab Ahmad Ayid.
Idsuang ahal dilo, noboros di Musa do nopo nga kiguno tuh kopongubasanan id linimput darjah kakaal ‘relevan’ miampai kogunoon sinakgon tomulok om montok poposudong tinan diolo miampai ‘trend global’.
“Poingkuro poh nga, iti okon komoyon do tolikudan tokou o koubasanan om kooturan ngawi kinoiyonon om au kaanu poposodia do ahal diti soira paparayat do toilalaan. Iti kotopong miampai tulu pitimbungakan toun diti, “New Directions in English Language Education: Global Trends and Local Innovations (Rikoton Kawawagu Idsuang Balajaran Boros Inggeris) Baharu Isuang Balajaran Bros Inggeris: Trend Global om Ponginwaguan Kinoiyonon),” ka disio.
Kokomoi balajaran id Sabah, noboros di Musa do iso mantad pongintongan tototopot koporintaan pogun nopo nga papatantu do balajaran posodiaon montok tangaanak ngawi om nakatamat sikul ih orohian montok tumanud do ponginabasan pangaan takawas miampai misokodung miampai koporintaan Pisompuruan montok manalasai do kogunoon balajaran id pointongkop Sabah.
Minoboros isio do ilo kaamung noh poposodia do balajaran bogian tosuriba id piipiro watas labus kakadaian om sikul pintangaan lobi agayo miampai kounalan asrama wonsoyon id watas ih haro mogigion labus kakadaian ih noilaan do osusa montok mongoi sikul.
Monongkotoluod ih Musa kumaa MELTA om puru komiti dau sabap kinalantaian diolo minanganjur do pitimbungakan dilo.
“Laang kapaganu do balajaran om miapu toilalaan mokianu dotokou montok au mokimaamaha tinan sondiri, om toririmo otopot tuh lobi ogumu tulun kaanu asil mantad pambalajaran, om idsuang ahal diti balajaran ih kikompitan miampai boros Inggeris,” ka disio. -Bernama