APMM pinapakakung ponginaman mogohimu mogowit lumabus petrol, iso bot pam tinaan
TAWAU: Agensi Popogirotkuasa Maritim Malaysia (APMM) nakaanu pinapakakung do ponginaman mogohimu mogowit lumabus tumau petrol doid pogun sombol id kawaigan Tawau di tadau Minggu.
Potunud Maritim Watas (PMD) Tawau Kapten Maritim Romli Hj Mustafa minoboros do kinagakaman winonsoi asil pimpanaan ‘krew bot’ ih nokoilo om minanaan iso bot pam kiikira jam 8.40 dongotuong id kawaigan Barat Daya Bawang Kinabutan.
“Asil pinomorisaan timpuuni nokoilo do kiharo songulun juragan kusai om songulun ‘awak-awak’ kusai kikotumbayaan rayat Filipina sompori-pori kiumur 35 om 40 toun,” ka dau mikuo minanamba do goduo-duo diolo au nogi nakaanu pinopokito do surat kointutunan tinan di totopot.
Ka dau, asil pinomorisaan potilombus nokoilo do pam bot ih nataan nogi minogowit muatan kisuang tumau petrol kiginumu 15 tong.
Minoboros isio do pinonoriukan timpuuni nogi nokoilo do bot dilo nokosuang noh id pogun diti piipiro tadau nakatalib om nokopogowit doti sumuang modidikot aiso kasagan (PTI).
Minaganu iyolo kosiwatan montok gumuli doid Filipina miampai mogowit kokoriu tumau miampai aiso kabanaran.
“Bogian Maritim Malaysia nokoilo do koinsanai tong tumau dilo mogowit daa lumabus mantad watas diti pakaayan id Bongao, Filipina mantad Batu 4, Tawau maya ralan kawaigan di au pinosurat,” ka dau.
Kawagu dau, pam bot om ‘awak-awak’ winoyo om nowit suminuang doid jeti Maritim Malaysia Tawau montok soriukon id suriba Akta Imigresen 1959/63 om Akta Tamangan Kokoriu 1961.
Tumilombus o bogian APMM popoingkawas om popogirot kagu pimpanaan doulu noh id kawaigan tawau montok mongipop kaparagatan kopogohimuan mantad timpu doid iso timpu.
Tulun togumu ih haro nunu noopo kopoilaan kadandang do undang-undang kawaigan Malaysia om kaagaban id daat pokionuon rumomut numbur 24 jam MERS 999 toiko 089-752115 bilik operasi DM18, Tawau.