# Lori naratu id disan nuluw iso tapak pamansaian
TAWAU: Songulun papamanau lori mamagaur simen noduso kalapas naratu id disan nuluw miampai lori om muatan dau, id iso tapak pamansaian id Ralan Sin Onn Tiku, hiti koniab.
Boyoon Pulis Watas Tawau ACP Fadil Marsus minoboros do munggui, Rais Bacho, 54, ih nagansip id lori dilo kiikira jam 9.10 kosuabon minidu pogun id tampat kinantakan.
“Pinonoriukan timpuuni nokoilo do pogului kinoligaganan dilo nantakan, munggui papamanau lori miampai muatan simen id koyuon nokosunsuri montok pakaayan doid tapak pamansaian.
“Nga soira nokorikot id tampat kinantakan, lori ih pinapanau dau tigog do natagak kapadtamangan pogului naratu doid suriba disan,” ka dau.
Minoboros Fadil do munggui natadon mantad Kg Pertama Bombalai om aiso saksi kinantakan nokito gisom baino diti, nga kakaal poh pulis papanau ponoriukan kokomoi do kes dilo.
Minongomi potilombus, noboros disio do ponoriukan kes dilo baino papanaon tumanud Seksyen 41 (1) Akta Padsakaian Ralan 1987.
Ponowoli naamot Boyoon Balai Bomba om Mongumolig Watas Tawau nokotorimo pamalahauan kaagaban kokomoi do kes dilo id jam 9.21 kosuabon maya MERS999.
“Ontok nokorikot id tampat kinantakan id jam 9.39 kosuabon, nokoilo tokou do iso lori mamagaur simen nakatangkid om naratu id disan nuluw,” ka dau.
Minoboros Faisal do bomba ih nokorikot miampai kagarasan duo injin om walu puru sansagan minomoguno do koumatan poimbida montok papalabus munggui ih nagansip id suang lori.
Pinosorou disio o papamanau injin tawagat kaamung lori mooi toririmo miingat-ingat ontok papanau do padsakaian sompori-pori.