Ruhangan kogumuo kapal
# Kopokionuon kumaa MASwings montok monginsonong kotorinaan id Sabah om Sarawak
KOTA KINABALU: Sumuang toun ko-10 MASwings papanau kotorinaan id Sabah om Sarawak, pokionuon o MASwings momoruhang do kogumuo kapal posodia haro montok papatantu do ahal kopongiduan ponuludan au nodi koimbulai.
Montiri Ponombuluian, Koubasanan om Kinoiyonon Posorili Datuk Seri Panglima Masidi Manjun minoboros do laang momoruhang kogumuo kapal posodia haro kiguno kopio montok monginsonong kagu kotorinaan MASwings id goduo-duo pogun diti.
“Pinoilo oku do soira haro iso kapal antakan karaagan osusa montok alanan miampai kapal suai sabap MASwings haro 10 kapal noh montok papanau kotorinaan id Sabah om Sarawak,” ka dau ontok uhoto kokomoi do koponginsonongan di apatut do wonsoyon do MASwings.
Noboros disio ahal dilo ontok romuto kalapas Abaabayan Pinoimaganan Tanda Negaraku (Negaraku Livery) id kapal MASwings hiti koniab.
Minoboros isio sundung pia poompus MASwings papanau kotorinaan diti kiharo piipiro ahal obuli insonongan nga miampai koinsasanai dilo nasantaban ginawo do Koporintaan Pogun miampai kotorinaan di pinatahak.
Kokomoi pinoimaganan dilo, minoboros Masidi do laang papataru do lambang ‘Jalur Gemilang’ dilo nopo nga ponokotanda koondom do pangaramitan Tadau Kabansaan om nogi ponokotanda do koupusan rayat Malaysia kumaa pogun.
“Alansan maya do pinonimpuunan diti kapanahak do kopongunsuban kumaa rayat id Sabah om Sarawak mooi kaanu papatanom sunduan ‘patriotisme’ kumaa diolo,” ka dau.
Namot dilo, pokionuon di Boyoon Montiri Datuk Seri Panglima Musa Haji Aman o MASwings mooi papataru do kotorinaan diolo id rontob di lobi akawas ontok timpu rumikot.
“Sabap do MASwing nakapanau kotorinaan, otumbayaan oku MASwings mongintong kogunoon montok papataru do kotorinaan diolo doid rontob potilombus dilo.
“MASwings kiguno kopio poposodia kotorinaan di osodu lobi osonong. Nga otumbayaan oku miampai kagarasan tinimungan ponorinaan MASwings, kopongintong tokou komponi ponuludan diti kiharo osodu doid tigulu,” ka dau id suang teks pason ih pinababai di Masidi.
Minoboros ih Musa do pinoimaganan kapal ih nogonopan miampai tanda Negaraku dilo koponulung papatanom sunduan oupus do pogun kumaa rayat id pogun diti.
Namot dilo, Boyoon Upisor Eksekutif MASwings Aminuddin Zakaria minoboros do laang papataru do tanda Negaraku id kapal MASwings dilo nopo nga kapangaputan ‘komitmen’ komponi nokomoi abaabayan ‘Ekspresi Negaraku’ ontok Mei nakatalib.
Laang tosonong ih pinomusarahan di Luguan Montiri montok papatanom sunduan ‘patriotisme’ id pointongkop pogun dilo potilombuson baino diti miampai papataru do lambang ‘Jalur Gemilang’ id iso mantad kapal MASwings.
“Yahai id MASwings nogi tumilombus minggisom manalasai do nunu noopo kobolingkangan di antakan montok monulung dagai montok lobi koburu id tigulu kaamung noh idsuang ahal koumoligan om kosonongon kotorinaan,” ka dau.
Id abaabayan dilo, Boyoon Upisor Eksekutif ATR Asia Jean Pierre Clercin pinapatahak do Anugerah ‘ATR Fleet Leader’ sabap kopomogunaan poingkakawas tikid tadau id pialatan 200 ATR ih papanau kotorinaan pointongkop pomogunan.