YPLJ monulung susumikul momoguno, potoluodon di Limus o toinsanan elaun di otorimo disio sabaagi lansanon rayat

KUALA PENYU: Kalapas nopo nakamanang tirikohon Lamin Koundangan Pogun (DUN) Kuala Penyu ontok Pomilian Tagayo Koinsanai (PRU) 2013, minomonsoi ih Limus Jury do ponigowaan do potoluodon disio o toinsanan elaun di otorimo sabaagi lansanon rayat.

Toluod dilo otopot nopo nga patahakon doid Yayasan Balajaran Limus Jury (YPLJ), iso tinan au momoguno do kountungan ih pinotimpuun di Puru Lamin Koundangan Pogun (ADUN) dilo sondiri, pogului pinoboros sabaagi calon Barisan Nasional (BN) id watas dilo.

Iman-imanon tagayo YPLJ nopo nga poposodia do sakadai kousinan kumaa susumikul ih momoguno id watas Kuala Penyu, au mongiro korohian pulitik molohing toiko korikohonon agama.

Yayasan dilo tuminimpuun papanau kotorinaan sominggu kalapas nakamanang isio PRU dilo om minanahak sakadai kousinan kuminaa 18 susumikul mosikin ontok timpu diri.

Mantad timpu diri, mininggisom kuminaraja ih Limus montok mogium kousinan montok poposigampot do imanimanon yayasan dilo ih pinorijisto miampai poimbida miampai Suruhanjaya Syarikat Malaysia (SSM) ontok 22 April 2015.

“Monongkotoluod kopio oku kumaa tulun ngawi om tinan ih minonokodung karaja YPLJ, nogi kumaa Koisaan Pasokmomogun Kadazandusun Murut Misompuru (UPKO) om BN pogun ih minanahak kosiwatan kumaa dogo manahak kotorinaan kumaa rayat id Kuala Penyu,” ka disio kumaa Bernama hiti koniab.

Puru Tinan Takawas UPKO dilo minoboros do gisom wulan (Julai) toun diti, kiginumu 512 susumikul mantad sikul pintangaan gisom tinan ponginabasan takawas, nokotorimo sakadai kousinan om suai-suai sakadai mantad YPLJ..

Susumikul ih kinangaian tosonong idsuang balajaran diolo nogi nonuan ‘insentif’ poimbida maya ‘Anugerah Pelajar Cemerlang YPLJ’.

Suai ko ilo, ADUN kiumur 55 toun ih natadon mantad Kampung Melampai, Kuala Penyu nogi manahak pongintongan tototopot montok popoingkawas kogunoon ‘sosial’ om ‘infrastruktur’ montok rayat id watas dilo.

“Miagal nogi watas tongosodu ih suai, mogigion Kuala Penyu nogi kakaal momoguno do kounalan ‘infrastruktur’ ih lobi tosonong miagal talun alun, kapanahakan lotirik, waig tolidang om tiyonon lilintuhunon tulun togumu.

“Sundung pia irad dilo, mositi moboros oku do Kuala Penyu haro timpu tabantalan di tosonong, doulu noh mantad kawo kobulihan ponombuluian. Watas diti haro disan daat di oborisi om olumis om kosunion ngawi di au kinasou.

“Sabaagi lansanon rayat, iman-imanon ku nopo nga montok poposiliu do Kuala Penyu iso tiyonon ponombuluian kiguno id pogun diti toiko id winorun diti doti. Kuala Penyu nogi poinsumpak id bogian kotonobon Sabah om au osodu mantad longkod pogun,” ka disio. -Bernama