276 munggui liud pinakawasa muli
TENOM: Kiginumu 80 paganakan kopoompit do 276 munggui liud id Kampung Labut Dua om Kampung Ponontomon hiti pinakawasa muli id tiyonon sompori-pori koniab.
Ponorikohon Kaantakan Taraat Kinoiyonon Watas Madiyem Layapan minoboros do ilo sumusuhut koyuon tawan di osonong om rontob waig Bawang Podos maid-laid sumonod piagalon ontok tadau Koiso kiharo id rontob kopoingatan, ilo nopo nga 176.75 meter.
“Koinsanai munggui dilo sompori-pori pinoiyon id longkod kopowolihan id Lamin Koubasanan Kg Ponontomon om Dewan poingukab Kg Labut di kosuabon tadau Koiso,” ka disio kumaa monunurat abar kalaaps pinapaharo do pongintongan liud id goduo-duo kampung dilo.
Pinatarang disio, goduo-duo longkod kopowolihan dilo notutuban noh kiikira jam 11 kosuabon koniab kalapas koinsanai munggui pinakawasa muli.
Ka disio, id kinantakan timpu diti aiso nunuunu kinoligaganan kiniopon pinoruput.
Ontok timpu iso’i, pinosorou nogi di Madiyem o mogigion kampung om tulun togumu id posorili watas diti montok mundaliu doid tiyonon di lobi oumlig sokiro ko haro tandatanda liud antakan kagu om rumomut doid bogian monguasa montok laang potilombus.
Namot dilo, munggui liud id goduoduo kampung dilo monongkotoluod sabap koposodiaan bogian komiti kaantakan taraat kinoiyonon minonulung munggui liud.
Suai ko ilo, alansan nogi iyolo do kaanu o bogian pointantu poposodia do koumatan dapur om kapanaakan waig tolidang ontok kiharo id goduoduo longkod kopowolihan montok papasanang do munggui liud miyon id koyuon lobi osonong.
Molohingon Kampung Kg Ponontomon, KK Tatusik Balari, 54, minoboros do kampung diti asasaru do oliudan om longkod kopowolihan id lamin koubasanan dilo nopo nga pongiyanan do munggui liud ngawi.
“Yahai mogigion hiti sansagan mogolos koumatan dapur mantad munggui liud ih suai om waig tolidang sansagan momoguno waig mineral,” ka disio.
Ponorikohon JKKK Kg Labut Dua Suliman Sapau, 52, monongkotoluod nogi sabap koposodiaan bogian komiti kaantakan taraat liud watas diti monulung mogigion popoundaliu doid longkod kopowolihan om manahak do sakadai kogunoon di kangaam kopio.