Tulun ngawi Sina id Sabah mositi misompuru: T.C Goh
KOTA KINABALU: Tulun ngawi Sina id Sabah kaamung noh Hokkien mositi miiso montok sumiliu papatantu kumaa nasib pogun diti ontok Pomilian Tagayo Ginumuan ko14 (PRU14).
Porosiden Gabungan Koisaan ngawi Hokkien Sabah om Tana Pisompuruan Labuan Datuk Seri Panglima T.C Goh minoboros do mogigion ngawi Sina id pogun diti kaampai mantad 23 paratus noopo om kosompuruan ih pinaharo do tulun ngawi diti obuli manahak asil kiguno kopio montok papatantu do timpu tabantalan Malaysia.
“Kopoompit tokou do 23 paratus noopo mantad koinsasanai ginumu rayat Malaysia, tantu noh do lansanon rayat mogigion diti okitonan olomi om koyuon oruhangan oinggorit soira do mogiurias tokou.
“Mantad dilo, nopo nga kopolunggui kopio sokiro ko au tokou kaanu miiso montok manahak asil tosonong ontok PRU14, doulu noh baino hinonggo kiharo pibabakan id pialatan pongundi Malayu,” ka dau id Abaabayan Kinouliton Toun Ko-43 Gabungan Koisan ngawi Hokkien Sabah om Tana Pisompuruan Labuan om Abaabayan Koposilihan Komiti Longkod, Komulakan om Koonduan kawawagu hiti, di songkoniab.
Koilo isio do Malaysia baino nawagatan miampai mogisusuai ahal miagal kinorotuon mato tusin, koyuon gatang petrol di au atantu id dagang ‘global’, koponguhanan Sukai Barangan om Kotorinaan (GST), ‘tred sentimen’ kaagamaan om pitinaruan ih maid laid mingkawas, undang-undang ‘hudud’, kes ngawi susuap om koyuon pulitik di au aandang.
Alansan kopio ih Goh do momuruan poingkakawas pogun diti kaanu manalasai do ahal ngawi diti tuh kaanu mogowit kalansanan wagu om kopuahangan kumaa pogun diti om rayat diolo nogi.
Tumanud dau, karaja irad dilo nopo nga ahal tagayo ih kapanahak doti do kotumbayanan pongundi montok mongundi porinta.
“Pokionuon ku nogi doid sinakagon mogigion Sina kalaaps pogun nokosigampot kinalantayan montok lobi mamagatang do pinongolubukan ih winonsoi pogun diti montok momodimpot korikohonon kinalantaian.
“Mositi tumilombus toou gumaga do pogun tokou montok popoturidong dino gisom lobi koburu ontok timpu tabantalan,” ka dau.
Suai ko ilo, monongkotoluod nogi ih Goh kumaa toinsanan puru koisaan dilo sabap minanahak sokodung poimponu kumaa dau montok tumilombus momuruan do piromutan dilo.
Id abaabayan ih iso’i, pinapatahak nogi isio do surat palantikan kumaa mononontuduk ngawi tapantang suai suai ko pinapatahak do toluod kiginumu RM10,000 kuminaa Sikul Pintangaan (SM) Kian Kok.
Nokotindapou nogi id abaabayan dilo Montiri Karajakaraja Poimbida Datuk Datuk Teo Chee Kang.