Kotumbayanan tulun tokou di pogulu poh

Soira awuk, au nodi diolo ahandaman o kinohoroon di rusod taraat dino gisom do modsinding yolo om koboros do boboroson dii araat nga au diolo opurimanan. Timpu mamanau muli mantad dumo nogi nung nokoinum yolo do linutau, au nogi diolo opurimanan po do korongou tuni lokiu toi ko kokito lontugi om wulanut tumalib do ralan.

Kotumbayaan tulun KD pogulu miagal diti i pinungaranan do tulun Kotonobon (Western people) do “the practice of animism” ka, nopo nga minomungou koulun-uluno tulun KD di pogulu. Koulunuluno dino notungkusan do sinakagon diolo. Koulun-uluno tulun KD di orosian do rusod taraat dino nopo nga kaampai no gunrosi (timid), guntalou (coward), obinronok (apprehensive), obintumboyo (too obedient), oindamaan otulid ginawo (too honest), tumopot kopio (very serious), oruhai okuro-kuro (easily annoyed/disappointed), moningau (paranod), mongiwogu (jealous), basug (foolish), obingikum (shy) om mayasuuyut a ‘yes-man’ attitude.

Timpu diolo id labus kakadayan di au po nakaamung yolo tinaru suai, osonong daa o kopoposion diolo id labus kakadayan tu okuudi toi ko aiso songuulun diolo di katama manakau, mamatai, mangaraag, mongiiriira, momudut, mongindaraat, monginsasana om susuai po. Nga baino soira poingamung o sinakagon diolo do tulun suai id kadai om id kakadayan, agayo dii koimamangan diolo do tori-torion, bosugan, buyukan om sasanaan dilo tulun mantad tinaru suai.

Tulun mantad tinaru suai aiso o kotumbayaan miagal do kotumbayaan tulun KD iri no tu kotumbayaan do kinohoroon rusod taraat dino i kaanu pokoruol om papaakan nogi diolo di pogulu. Id kinoyonon id kakadayan, id tiyonon sumikul om poingkaraja id upis timpu baino opurimanan do tulun KD do asaap om oroti yolo dilo tinaru suai. Iri no nokobungou nokuro tu au obinrosi, au guntalou om au oruhai obosugan ilo tulun mantad tinaru suai.

Soira do okito dilo tinaru suai koulunuluno tulun KD do miagal dilo narait id sawat, maganu dii do kosiwatan ilo tinaru suai lolobi om tinaru tangagayo do mongulok, monori, monorotoro, monolod, magahau, mangagampak, mamasug om momudut do tulun KD.

Nga timpu baino diti ogumu nodi tulun KD nokopuriman do koimamangan diolo do miagal diti loolobi po sorohon diolo tangaanak diolo songinskul. Mada yolo do asaladan do kosiwatan, koyonon om timpu tosonong do minsingilo mato pinsingilaan Science, Mathematics om boros English id sikulan porinta. Sinakagon do KD ogumu nodi nokosikul id taang takawas miagal ko university. Ogumu nodi diolo ii poingkaraja id upis porinta. Timpu abantalan, lobi podi kopuriman o tulun KD pamamasug dilo tinaru tangagayo sundung po do timpu baino kakaal ogumu tulun KD do obosugan, oudutan om sasanaan dilo tulun mantad tinaru tangagayo.

Ralan do tulun KD milo sumimban mantad koimamangan diolo narait id sawat nopo nga maya do tumaud yolo do ponontudukan takawas (higher education) om kotonudan tagaras (active participations) id kaparagatan sipoot miagal ko badminton, tennis, manangkus, mangagantai winagat, popolombon do tonsi tinan, mongindapu tagayo, sumiliu momomorun walai (architects), sumiliu dokutur pongolingasan (medical doctor), monunuduk (teachers), mingaayak (actors/actresses), popotulud kapal (pilots), om susuai po.

Do naamot diolo mimparagat id gana pokimamaan kalantoi tinan om tutok id gana toilalaan narait id sawat, gunoon daa do tulun KD boros tina (mother tongue) miampai do aiso kotingkadan sabaagi boros di milo popiimpori pomusarahan diolo (giving them independent of thinking ) om poposimbayan diolo (giving them freedom) do atus paratus do rumayou Kinorohingan id walai panambayangan diolo miampai do au momoguno boros tinaru suai do mangarayou Kinorohingan.

Toilalaan do tulun KD do boros English milo mogowit diolo kumaa id limunduk toilalaan sokinawas dilo nulu Nabalu, om kotumbayaan diolo do Injil mantad Kinorohingan Gampamasi milo parantai pomusarahan diolo do pomusarahan do tulun tapantang (tulun Hebrew) id pomogunan diti.