Boogizan monguasa kinoizonon pokionuon maganu haang tosisikap monguhan hizud
KOTA KINABALU: Songuhun mantad mogiigizon Kampung Bantayan Inanam mokianu tu Hamin Kakadazan Tagazo Kota Kinabalu (DBKK), Koupisan Tana om Monukat om Koupisan Ponguhuzungan om Kohuzungan montok maganu haang tosisikap montok monguang do antakan dati kohigaganan hizud ih notoguvang di vookon mogiigizon id kampung dino.
Pinopoluput Tobpinai Jiton Gutol, 59, ih natadon mantad kampung dino nokomoi pinopointahang do hamin disido nosuvang vaig hizud sabap do kohomion kakaalahanon palit ih posodia kivaa.
Hizud ih nantakan ontok vuhan nakatahib okon noopo nokodonto hamin ku katapi nogi mogigizon suvai doiti om natadon tagazo hizud nga sabap do sanganu tana id douvi hamin minaganu haang miampai minonguntun tana montok kapaganu do kountngan.
“Tana ih naanu di sanganu tana dino nopo nga tana nuhu ih kivaa id sanganu tana suvai miampai aiso kabanalan mantad sanganu disido.
“Iti nopo nga iso haang di au avasi gisom natadon do hizud kihinanggou tohu kaki nokosuvang id daamin ku,” ka disido doid monunuat abal ontok kosoomo doiti, di tadau Koonom.
Minoboos isido, palit posodia tinoodo di sanganu tana dino humuzung doid bavang au kouha sabap do tana ih humuzung dino poponini vagu hinahom bavang.
Tumanud disido, boogizan hamin disido ih osiibo om nohizudan sabap do sanganu tana id sampaping minaganu tana miampai aiso kasagaan mantad nuhu montok popoingkavas do koizonon.
“Nokoponoodo zou no luputan doid boogizan kikoompitan id toun nakatahib nga aiso nunuunu haang sumusuut tinoodo.
“Mantad dino baino diti mokianu zou tu kapaganu haang di kosudong montok monguang do antakan dati kohigaganan hizud id kampung diti,” ka disido.