Nokuro ma tu oruhai obosugan o tulun KD?
dino nopo nga tumimpuun id tulu (pomusarahan) diolo okon ko mantad id tinan diolo. Nunu ma komoyon do oruhai obosugan? Rati diti nopo nga oruhai aangayan, mayasuuyut, oruhai obuyukan om oulakan do tulun suai id gana pomusarahan, nga okon ko id gana kagarason do tinan.
Tulun Kadazandusun (KD) di pogulu kikagarasan om agaras tinan diolo moyo toilalaan om sinundu Komburongo mongintutun om nogi toilalaan diolo do Kuntau (self-defence art). Kuntau dino agaras do gunoon diolo sumaap tulun ponokisaap (enemies). Kuntau nopo nga mungkiwa (strikes) tumanud do dipok (physiological alignment/ stances), laang (steps) om mongontok do kopokian (points of fatality). Tulun KD di abaal toilaan do kuntau obulun (brave), aiso pokironok (fearless) om osiou (stunt) isio.
Nga id gana pomusarahan tutok do ogumu au noilaaan do tulun KD di pogulu. Kokudian toilalaan tutok dino okon ko minantad do basug o tutok diolo nga mantad no do porintaon yolo do iso rusod taraat om orongit. Rusod dino nonuan diolo piipiro ngaran. Haro i pungaranan do Bambarayon, Rogon, Tompu, Monunuka, Moninisi, Mongingiyon, Pamaya-baya, Longis, Tulok-ulok, Sumasara, Mananapun om Monunuang. Kinohoroon do rusod taraat ngawi dino podosian diolo do au ogiigina. Wookon tayam miagal ko tombolog lokiu (tutukori), wulanut, lontugi om ogumu po suai, sorohon diolo do susuhuon (servants) do rusod taraat dino. Poomitanan, miagal ko soira kumaa yolo id dumo om nung kokito do lontugi tumalib ralan toi ko korongou tuni tombolog lokiu monguni, au kawasa (au milo) yolo tumilobus mongoi id dumo nga mositi no do gumuli id walai. Nung sansagan mongoi id dumo katalib nokokito toi ko nokorongou, otogod kaaka i rusod taraat dino om poporikot do tomporuruol kumaa tulun di au minokinongou pogoduhan do rusod taraat dino.
Sundung do miagal dii, tikid do pogoduhan rusod taraat dino, haro ralan diolo do popotingkod toi ko magalai mantad oontok tomporuruol ii porikoton dii rusod taraat dino. Ralan dino kaampai no mogondi om momurinait do momoguno komburongo tu milo mogowit diolo mogidu mantad tomporualan do rusod taraat dino. Momurinait om mongomburongo dino nopo nga songulun o Bobolian tondu toi ko kusai (priestess/priest) i koilo kaaka monokiboros di rusod taraat dino om milo mokiampun toi ko mokiinggaan do sogit pokionuon dii rusod taraat dino. Moginakan nogi nga iso ralan diolo monubak (poposonong do pomusarahan di rusod taraat).
Moginakan nopo diti nga momonsoi yolo kinomol mantad di parai togumu noomot diolo. Parai dino pinatahak do Bambarayon om mantad no dino do mositi subakon (appease) diolo i Bambarayon. Au nopo subakon nga au kaaka yolo onuan di Bambarayon do parai togumu id toun dumontol.
Timpu mangarayou yolo tadau kaamatan om moginum yolo do kinomol nogi nga iso o ralan poinduruyan (pounayan) do tulun KD di pogulu do mongidu mantad orosian di rusod taraat.