Agensi koumoligan mositi aparagat mongilo surat pilasu tulun songkosuian
KOTA KINABALU: Agensi koumoligan mositi lobi aparagat montok mongilo kopomogunaan surat pilasu mantad tulun songkosuaian montok sumuang Sabah, ka di Monunurat Tinan Piupakatan Suluk Sabah (MPSS) (MPSS) Mohd Zaki Harry Susanto.
Minoboros isio do ahal dilo kiguno kopio intongan totootopot montok papatantu do aiso nodi tulun songkosuaian tumanud ginawo sondiri noopo momoguno do surat pilasu montok sumuang kawaigan pogun doulu noh id Sabah om koidu mantad pongintongan tinan monguasa.
“Agensi koumoligan nogi alansan maganu suntutoiko pangajaran kokomoi au nakaanu minongilo kopomogunaan ‘dokumen’ au otopot (palsu) mantad tulun ngawi songkosuaian montok sumuang Sabah miagal ih pinoruput do kapaabaran di kawawagu sabap ilo kopokito do kolomian agensi kikoompitan montok papanau do karaja tikid tadau diolo.
“Au tokou obuli monondos ilo sabaagi kes okodo kopio sabap asil kolomian nopo nga agayo. Ilo okon noopo kopokito do kokuasaan poingkakawas pogun asanang mamaraag katapi nogi poompiton miampai kaparagatan tinimungan posodia misangod (militan).
“Mositi momonsoi toiso-iso ahal di kangaam kopio montok popoingkawas do katabayan kopongilaan surat pilasu id toinsanan longobon sumuang pogun doulu noh id pogun Sabah,” ka dau id kopoilaan hiti koniab.
Noboros di Mohd Zaki ahal dilo sabaagi minongomi ruputan media kokomoi do pinanahanan walu ‘militan’ ih mamalan papaharo pisangadan pinonutuban Sukan SEA di kawawagu, duo mantad diolo kikotumbayaan suminuang Sandakan maya Kepulauan Basilan, Selatan Filipina miampai minomoguno do ‘dokumen’ pilasu.
Id suang ahal dilo, minoboros Mohd Zaki do muhang nogi MPSS do porinta manahak kopoguluonan kumaa laang montok popoingkawas do katabayan harata kakamot kiteknologi doung kawawagu mooi koponguhanan karaja tototopot mantad agensi kikompitan lobi kiasil montok kotilombus mamajamin koumoligan tulun ngawi doulu noh id bogian disan daat kosilahon Sabah.
Poingkuro poh nga, monongkotoluod nogi o MPSS kumaa bogian Koiyonon Koumoligan Poimbida Papak Kosilahon Sabah (ESSCOM) id suriba kopomuruanan komander ih wagu sabap baino kinohoroon ESSCOM lobi opurimanan id bogian gamut sakot, ka dau. -Bernama