Maybank mininsomok rayat
# Lobi 20,000 pinapalantoi do Tadau Tonggungan Sosial Korporat Global
TUARAN: Lobi 20 noribu pakakaraja Tinimungan Maybank id pointongkop pomogunan uminampai Tadau Tonggungan Sosial Korporat Global.
Id Pogun Sabah, Potunud Bogian Maybank Sabah om WP Labuan, Liew Lui Choo, minomoyoon do abaabayan Tadau Songowian Koisaan Tulun Nobolou Sabah, hiti.
Abaabayan dilo nopo nga kopinamot abaabayan kapanahakan Longkod Refleksologi ih nopongo noh montok kounalan tulun bolou.
Tumanud Liew, laang tosonong dilo okon noopo kaanu monulung tulun bolou popoingkawas do konuonuan diolo, katapi nogi kaanu mongingkudi do kobolingkangan kousinan om manahak asil kumaa puru paganakan diolo.
Abaabayan dilo pinotimpuun di Montiri Koporintaan Kinoiyonon om Pomulaminan Datuk Seri Haji Hajiji Noor, ih linansanan di Monunurat Pulitik, Abdul Kassim Razali.
Id suang teks pason dau, monongkotoluod ih Hajiji om kapamagatangan kumaa Maybank ih nakaanu mininsomok tulun ngawi doulu noh ih okurang kinasib tosonong kaamung tulun nobolou.
Pokionuon disio mooi bogian misosondiri om Korporat kaanu manahak kosiwatan pakarajaan kumaa tulun nobolou ontok timpu rumikot.
Porosiden Koisaan Tulun Tulun Nobolou Sabah Datuk Rosalind Chew minamagatang om monongkotoluod nogi kumaa Maybank Sabah om WP Labuan ih binuruan di Liew miampai karaja tolidas maya abaabayan tonggungan sosial korporat.
Longkod Refleksologi dilo koponulung doti popoingkawas do rontob kopoposion om konuonuan paganakan tulun nobolou.
Kopinamot abaabayan sangadau dilo, lobi 500 pakakaraja Maybank posorili Kota Kinabalu kaamung noh raan Kudat om Ranau om Unitunit mantad Upis Bogian uminampai dilo.
Raan suai ih pinapaharo nogi do abaabayan id bogian sompori-pori kaamung WP Labuan, Lahad Datu, Sandakan, Tawau om Sipitang.
Kapanahakan ‘replika’ kunsi linominon Longkod Refleksologi ih nokopomonu balanja lobi RM200 noribu dilo pinatahak di Liew kuminaa Rosalind, miampai sinaasi di Abd Kassim om upisor wanan Maybank mantad longkod upis Maybank id Kuala Lumpur om upisor wanan Maybank Sabah om WP Labuan.
Kousinan kapamansaian longkod dino nokomoi naanu asil karaja pakakaraja Maybank id pointongkop Sabah om Labuan maya do piipiro kaparagatan kotulunan kaamung noh kapangadagangan kakamot tinunturu tulun bolou suai mantad pakakaraja Maybank sondiri.
Pialatan kaparagatan di pinapanau ontok tadau dilo nga kapadagangan kakamot tinunturu winonsoi tulun bolou om kotorinaan ‘refleksologi’ mantad tinimungan dilo.
Suai ko ilo, puru paganakan tulun bolou nogi kikosiwatan mamain buul padang, migayat dukug om mamain dart miampai pakakaraja Maybank di ongosuau om ounsikou kopio.
Pakakaraja Maybank nogi minogitatabang minamalangga do koiyonon Longkod Refleksologi sabaagi toluod winakas kumaa longkod dilo.
Ontok timpu iso’i, pakakaraja Maybank pinoliis miampai sinding ngawi tolonoi mantad tulun bolou naampot do mamain tunion diolo sondiri.