Gading gajah, sisik bulukun kigatang RM80.5 riong nahau Kastam
KOTA KINABALU: Kastam Sabah minamagahau tolu gading gajah om limo tan sisik bulukun kigatang kiikira RM80.5 riong ih owiton daa lumabus maya Lolokiton Sepanggar ontok 29 Ogos nakatalib.
Boyoon Potunud Kastam, Datuk Seri T. Subromaniam minoboros do 1,148 watang gading gajah kigatang RM9.9 riong om sisik bulukun kigatang RM70.6 riong dilo nahau asil pinomorisaan kumaa duo tinan kontena ih pinatantu kisuang kasang tana ontok 30 Ogos nakatalib.
“Gading gajah om sisik bulukun diti kikotumbayaan natadon mantad Afrika om minaya lolokiton iso pogun pongiros pogului suminuang doid pogun diti,” ka dau kumaa monunurat abar hiti koniab. Nokotindapou nogi ih Potunud Kastam Sabah Datuk Hamzah Sundang.
Tumanud Subromaniam sumusuhut pinamahauan dilo, songulun kusai kinoiyonon kiumur 43 toun tinaan reman id suriba Seksyen 135(1)(A) Akta Kastam 1967 montok monulung ponoriukan sabap kikotumbayaan do mongudar momoli barangan pogoduhan.
Id suriba seksyen dilo, natandasan obuli dandaan gisom 20 kogumu gatang barang toiko kojiil au kolobi tolu toun toiko goduo-duo dilo nung katantu do kasalaan.
Ka dau pinonoriukan nogi winonsoi id suriba Akta Pomunsaan Ponimbanan Tusin Tolosok om Pomunsaan Pongobian Karaaton hinonggo akaun sosongulun om komponi ih noilaan maan potingkodo.
Uhoto kokomoi tiyonon timpuuni om tiyonon kontena dilo, noboros di Subromaniam do kontena dilo kikotumbayaan nowit mantad Nigeria nga minumbaya id lolokiton ‘atangkangau kopio’ id iso pogun poingoros pogului suminuang pogun diti.
Tumanud dau kikotumbayaan do tiyonon tohuri noh kontena dilo nga China nga ilo kakaal id ponoriukan Kastam.
“Onu ih kopotigog dotokou nga kontena ngawi diti nakawaya noh iso lolokito id pogun doros. Nga Kastam Malaysia, nung mogowit barangan pogoduhan, au toou monokirunding toiko lumomi. Sundung pia tiyonon tohuri noh okon Malaysia nga tipuon tokou nunu noopo kopomilutan,” ka dau.
Mantad dilo minoboros isio do Malaysia au obuli anggapon sabaagi ‘transit’ montok kopomilutan barangan pogoduhan katapi mositi intongan mantad tiyonon suai ilo nopo nga kinalantaian Kastam Malaysia pinapakakung do kaparagatan dilo sundung pia ilo nakatalib noh lolokiton iso pogun doros.
“Manahak oku kopoingatan kumaa bogian ngawi ‘sindiket’. Kada pogumbal momoguo lolokiton id Malaysia montok momilut toiko mogohimu mogowit barangan tolosok doulu noh barangan pogoduhan,” ka dau.