Pomusarahan mangamu-amu pomorunan pomutanaman mositi simbanan: Musa
TUARAN: Pomusarahan toiko panandasan wookon tulun ngawi di mongintong osuriba doid bogian pomorunan pomutanaman mositi simbanan sabap do kaparagatan dilo baino nakaanu noh pinoposoribau do ogumu tulun nakalantoi om kaanu popoingkawas do konuonuan di lobi kopongunsikou.
Minoboros ih Boyoon Montiri Sabah, Datuk Seri Panglima Musa Aman do pomorunan pomutanaman baino okon nogi momoguno do koumatan koubasanan, nga nokosimban kumaa ‘teknologi’ doung kawawagu om koponginwaguan di osiliu ponoluod tagayo asil koburuon pogun doulu noh id Sabah.
“Au nodi intongan pomorunan pomutanaman sabaagi karaja poinsusuriba, nga nosiliu nodi iso ponukuan kawawagu sabaagi pomorunan toiko kopongindapuan di obuli popoburu pogun, om nogi mongindapu maya asil di aanu.
“Mantad dilo, otumbayaan oku do ‘Dasar Pertanian Negeri Sabah Ketiga’ (DPNS3) ih pinotimpuun di Komontirian Pomutanaman om Pomorunan Taakanan (Mafi) kotoboi popoingkawas do pangalabusan, popoingkawas do koumoligan taakanan om ‘produktiviti’ suai mantad poposoribau do tinimungan mororobuat, momukabun om momutayam ih koponokialit tumounda om kalantoi,” ka dau.
Noboros disio ahal dilo ontok minanahak boboroson pinotimpuun do Pangaramitan Tadau Momukabun, Momutayam, Monginsada nayatan pogun Sabah (HPPNS) 2017, id Dewan Sulaman Tuaran koniab.
Id ningkokoton suai, alansan kopio ih Musa kumaa toinsanan bogian kopomoguno do pangaramitan Tadau HPPNS montok mongukab kobulihan om popoingkawas do toilalaan kikoompitan koponginwaguan om ‘teknologi’ idsuang kaganaan pomutanaman, pomutayaman om ponginsadaan.
Ka dau, tumilombus nogi porinta minggisom papatantu do kapanahakan taakanan toririmo kopomogonop do kogunoon rayat id pogun diti katanud atambaan mogigion ontok 2030.
“Alanan oku nogi tuh garai ngawi koupisan, tinan ponoriuk om pomokabunan ih popokito do teknologiteknologi ponorinaan tanom, tayam om ponginsadaan om kopoindalanan ‘produk industri hiliran’ kaanu miapu pomusarahan, kopokionuon montok gunoon tososonong di mongindapu toiko sumodia sumiliu mongindapu montok pangalabusan ‘produk’ taakanan koula, osonong om oumolig.
“Alansan do pangaramitan HPPNS toun diti kopoingkawas kagu sunduan om angkab tulun ngawi momukabun, momutayam om monginsada tokou montok papadalin do toinsanan laang tosonong ih papanaon do porinta montok popoburu do pomorunan pomutanaman om nogi popomilo do rayat kapaganu do kopoposion di lobi tosonong,” ka dau.
Nokotindapou nogi id abaabayan dilo nga Kumoduo Boyoon Montiri Datuk Seri Panglima Yahya Hussin, Montiri Ponombuluian, Koubasanan om Kinoiyono Posorili Datuk Seri Panglima Masidi Manjun om Montiri Koporintaan Kinoiyonon om Pomulaminan Datuk Seri Hajiji Noor.