102 panagih dadah tinaan AADK maya ‘Operasi Bersepadu’
KOTA KINABALU: Agensi Anti Dadah Kabansaan (AADK) minanaan 102 tulun maya ‘Operasi Perdana Siri 1/2017’ ih pinapanau id piipiro koiyonon id posorili longkod pogun. Potunud
AADK Sabah
Bakri Bibi minoboros do koinsanai Tulun
Ih Noilaan (OYDS) ih tinaan maya operasi solinaid tolu tadau tuminimpuun tadau Koduo gisom tadau Kaapat nakatalib noppo tulun kinoiyonon kiumur 12 gisom 40 toun.
Poompus pinapanau karaja (operasi) dilo, minanaan o bogian dau do kiginumu 130 tulun om kalapas maya pinoniisan timpuuni 28 mantad kinagakaman nopo nga ‘negatif’ om pinakawasa minuli doid koiyonon sompori-pori.
Ka dau, OYDS ih id suriba umur nakaatod noh doid Koupisan Kotundunan Yarat (JKM) montok laang pomolingosan potilombus.
“Manahak tokou pongintongan poimponu koiyonon di haro kaantakan koligogon, doulu noh miagal bogian koponguhanan Pogowian Manangod Dadah (PDH) miagal bogian Likas, ilo nopo nga id Kampung Likas, Cenderamata om Taman Keramat om piipiro koiyonon id Manggatal om Sembulan.
“Operasi diti nogi montok mongilo OYDS id bogian PDH montok mongingkudi do kopomogunaan om miyon id lokap AADK kawawagu ih kiharo id Papar,” ka dau.
Minoboros isio do poompus ‘operasi’ pinapanau di puru AADK nokotoguang mogisusuai laang wonsoyon OYDS, kaamung kobolingkangan puru paganakan au karati miampai laang kopongumoligan AADK kumaa diolo ih nokoompit.
Tumanud dau, koinsanai OYDS ih tinaan soriukon tumanud Seksyen 3 (1) (a) Akta Panagih Dadah (Pongubatan om Pongolingosan) 1983 Pindaan 1998 sabap kikotumbayaan do panagih dadah.
Kawagu dau ‘operasi bersepadu’ nampayat di 30 puru AADK om 30 puru agensi suai kaamung Dewan Bandaraya Kota Kinabalu (DBKK), Koupisan Imigresen, Rela, Tinimungan Gugumaga Tulun Ginumuan Malaysia (APM) om JKM.
Namot dilo, songulun OYDS ih nointutunan sabaagi Imah, 31, noopo minoboros do minaganu isio syabu tuminimpuun duo wulan nakatalib montok manalasai do kosotolan poimpasi sumsuut kobolingkangan paganakan di notoguang dau.
Tumanud dau, kaanu isio kapanaakan syabu miampai asanang ilo nopo nga mantad tambalut dau ih kiharo id Sembulan.
Ka dau, ontok puru AADK minanaan dau, masaon disio poingodop id lamin om nokotigog miampai pinonugkuan dilo.
“Ontok diri nogi monosol kopio oku sabap nokoompit kasalaan momoguno dadah om au kaanu manamong onom tanak ku lobilobi kagu tanak tohuri ku kiumur onom wulan,” ka dau.
Imah ih nogi nakasawo noh lumansan kopio miampai kopoposion di lobi tosonong kalapas maya do kopoindalanan kopongolingosan om kiangkab tumingkod mantad kaparagatan mongisop dadah kalapas diti.