Tawau, Sandakan ‘zon aragang’
# Ririkoton PATI montok kapaganu do surat kointutunan sabaagi karayatan Malaysia
TAWAU: Watas Tawau om Sandakan noilaan sabaagi ‘zon aragang’ kalapas nosiliu ririkoton do modidikot songkosuaian aiso kasagaan (PATI) ih osotol montok kapaganu do surat kointutunan tinan sabaagi karayatan Malaysia.
Potunud Koupisan Koporijistaran Pogun (JPN) Sabah Datuk Ismail Ahmad minoboros do sumusuut ahal dilo pakakaraja JPN id bogian ‘zon aragang’ diti nogi kotoguang do ponginaman kaamung susuap mantad tulun songkosuaian ih muhang kapaganu do karayatan.
“Iyolo (PATI) diti kuminam momoguno do mogisusuai ralan om mongumpan puru popogirotkuasa miampai susuap sababaa montok kapaganu do ‘dokumen’ montok kiharo id Malaysia,” ka dau.
Noboros disio ahal dilo ontok minanahak boboroson id abaabayan tumaru om sumain tumaru koidu susuap (IBR) kopoompit do 105 pakakaraja JPN Zon Tawau om Sandakan songowian Tinan Monorina Pomunsaan Susuap Malaysia (SPRM) hiti, koniab.
Abaabayan dilo sinaasi di Potunud SPRM Sabah Datuk Sazali Salbi.
Tumanud Ismail, koinsasanai kogumuo mogigion Sabah ontok diti nopo nga 3.2 riong mogigion om mantad dilo 2.5 riong nopo nga tulun mamaamasok.
“Soosomok 800,000 nopo nga tulun songkosuaian ih kaampai mantad pakaraja, pasangan nokopisawo, tutumombului om modidikot aiso kasagaan,” ka dau.
Namot dilo kokomoi abaabayan IBR dilo, pokionuon di Ismail o toinsanan pakakaraja JPN doulu noh id bogian kosilahon Sabah momoguno do koubasanan ‘anti-susuap om monulung tulun ngawi idsuang ahal koupisan dilo.
“Nung kotilombus o susuap osiliu igitan ralan tonudon karaja om iti okon noopo momiraag do koupisan nga koinsanai porinta miampai kopoligogon pogun maya do kapangadagangan kointutunan pogun kumaa tulun songkosuaian,” kawagu dau.
Tumanud Ismail gisom baino diti kiharo 11 raan JPN id zon Tawau om Sandakan. -Bernama