Tinimungan ESSCOM minanaan 15 PATI
LAHAD DATU : Tinimungan Koumohigan Boogizan Papak Kohisaon Sabah (ESSCOM) minanaan 15 modidikot songkosuvazan aiso kasagaan (PATI) ontok kuminam sumuvang id pogun diti miampai aiso kasagaan id boogizan daat Kampung Makuou, kiikila jam 8 dongotuvong tadau Kaapat.
Komander ESSCOM DCP Dato Hazani Ghazali id iso kopoihaan minoboos do sontimungan puu mantad Unit Ponoizukan Pulis Marin Lahad Datu do naamot masaon popouhan porik ‘base’ pamadagangan tuhun om kopogohimuvan ‘migran’ id boogizan daat Sahabat 16 nokosoomo om minomolisa iso bot kavo jongkong ih pougadan id koozuvon miaga do kivaa au koontok (moosi-osi) ih kuminam minsomok do boogizan tisan daat kampung dino nokomoi.
“Ontok pinomolisaan tinoodo, kivaa 12 kusai om tohu tondu kiumul piahatan 1 gisom 64 toun kivaa id suvang bot dino nokomoi om aiso suat kointutunan tinan di totopot.
“Saavi-avi dioho tinaan sabap kikotumbazaan kuminam humosok sumuvang doid kavaigan pogun diti maza lahan di au pinosuat aiso nunuunu suat kointutunan tinan di totopot.
“Suspek om toinsanan balang na’au novit no doid Pangkalan Pulis Marin Lahad Datu montok haang potihombus,” ka disido.
Kes soizukon id siibo Akta Anti Pamadagangan tuhun om kopomogohimuvan ‘migran’ (ATIPSOM) 2007”.
Namot dino, ka disido, id sso kes misusuvai id uvang Semporna, tinimungan pulis marin Semporna nakaanu minanaan 8 PATI id boogizan koibutan kavaigan Mataking ontok kuminam sumuvang doid pogun diti maza lahan di au nokosuat kiikila jam 7.10 kosuvaon di tadau Kohimo.
Minoboos isido minaganu haang mozo kopoihaan Angkatan Tugas Bersama 2 (ATB2), sontimungan puu Tinimungan Pulis Marin Semporna ih masaon popouhan do ‘Ops Gelora’ id boogizan dino nokomoi minanaan om minomolisa iso bot kivotik obuog minomoguno do 2 unit injin pam ih pougadan mantad Filipina pakaazan id kavaigan pogun diti id koozuvon moosi-osi.
“Pinomolisaan potihombus nokoiho do vahu tuhun bajau daat kaamung juragan om songuhun tondu kiumul piahatan 775 toun aiso nunuunu suat kointutunan tinan di totopot.
“Koinsanai balang ngavi na’au ih kaampai mantad iso bot om 2 unit injin pam novit no doid Pangkalan Polis Marin Semporna montok haang potihombus.
“Kes zoizukon id siibo Akta
Anti Pamadagangan Tuhun om Kopomogohimuvan Migran (ATIPSOM) 2007”, ka disido.
“Mokianu zou doid tuhun togumu tu popoluput doid ESSCOM sokio ko kokito do nuununu noopo kapaagatan di kopotongob om kadandang undangundang pogun kaamung no mogohimu mogovit humosok balang-balang pogoduan doid Hongkod Operasi ESSCOM id numbul 089-863181 montok haang potihombus,” ka disido.