‘Juragan’ kuminam mogohimu mogovit humabus tong gas LPG tinaan APMM
TAWAU: Agensi Popogiotkuasa Maritim Malaysia, Uvang Maritim 18 Tawau nakaanu minanaan songuhun ‘juragan’ kinoizonon id kavaigan Tawau ontok sosodopon tadau Kohimo, kahapas noihaan mogohimu mogovit humabus tong gas LPG.
Potunud Maritim Uvang (PMD) Kepten Maritim Romli Hj Mustafa minoboos do krew bot mimpanau Maritim Malaysia DM18 minanaan bot jongkong id jam 5.30 sosodopon koniab ih moosi-osi id kavaigan Sungai Melayu kikotumbazaan pougadan doid Sungai Nyamuk, Indonesia.
“Pinomolisaan timpuuni nokoiho do kivaa songuhun juragan kusai tuhun Indonesia kiumul 20 toun masaon papanau bot jongkong dino nokomoi.
Pinomolisaan potihombus nokoiho do juragan dino nokomoi au nakaanu pinopokito do suat kointutunan tinan ontok pinolisa di kokuasaan Maritim Malaysia.
Kavagu disido, bot jongkog dino nogi noponuan minogovit muatan soginumu 50 tong gas LPG ih kikotumbazaan kuminam montok mogovit humabus mantad uvang diti miampai aiso nunuunu poomit di totopot.
“Juragan dino nokomoi tinaan om bot om koinsanai balang na’au piaga-aga kigatang RM25,000 novit no doid Jeti Maritim Malaysia DM18 Tawau montok soizukon potihombus id siibo Akta Tamangan Kapanaakan 1961,” ka disido.
Maritim Malaysia ka disido tumihombus popoingkavas kalaja kopogiotankuasa montok mongipop kapaagatan ngavi ih kahasa do undangundang id Zon Maritim Malaysia hoohobi kozo Kavaigan Kohisaon Sabah (Esszone).
Kavagu disido, nunuunu kopoihan kikoompitan kopomiumbakan undang-undang om kaantakan kaagaban id daat obuli puluputon miampai tumuubung tumihombus id numbul MERS 999 toi id numbul 089-752115 Hongkod Operasi Maritim DM 18.