Kusai nolohing noh nowuwu, walai nopunso notutudan

KOTA MARUDU: Songulun kusai nolohing noh noduso kalapas lamin tiyonon dau id Kampung Samparita Tengah hiti nopunso notutudan.

Id kinantakan kiikira jam 8.10 dongotuong tadau Minggu dilo, tinan munggui ih nointutunan sabaagi Yaad @ Abd.Shaad Enggok, 69, nokito do nowuwu noh.

Boyoon Pulis Watas Kota Marudu Superintendan Mohd Izaan Abdullah minoboros do ontok kinantakan, munggui ih poingiyon osongulunan kikotumbayaan do masaon poingodop.

Tumanud dau, tadik munggui Gutikah Enggok, 54, ontok sinunudan do mogigion kokomoi do kinantakan dilo minoi doid tampat kinantakan nga au nokosiwat minanampasi tabang dau.

“Pinonoriukan id tampat kinantakan nokoilo do lamin munggui kitukuan 20x30 kaki persegi nopunso notutudan.

“Munggui kikotumbayaan do au nokosiwat minogidu sabap do tapui osikap kopio guminayo kiikira limo gisom 10 minit,” ka dau pinapatantu do kinantakan hiti koniab.

Minoboros isio do gisom jam 9 kosuabon koniab, tinan munggui pinoiyon id linimput tinan lamin pongusapan montok pokizazakan monoriuk.

Namot dilo, moboboros bomba pinapatantu do nokotorimo o bogian diolo do pamalahauan kaagaban id jam 8.37 dongotuong om nokorikot id tampat kinantakan id jam 10.49 dongotuong.

Piwolitanan rumikot id tampat kinantakan kiikira 35 kilometer om papanau karaja kopomisokan naawi id jam 11 dongotuong.

Natadon kinantakan kakaal id ponoriukan.