‘Suspek’ kes manakau kisinjata ginakom pulis
KOTA KINABALU: Duo kusai ‘suspek’ kes manakau kisinjata nakaanu minamagakom id duo pinonugkuan ontok 6 September nakatalib.
Boyoon Pulis Watas Kota Kinabalu Asisten Komisioner M Chandra minoboros do goduo-duo ‘suspek’ dilo kiumur 25 om 27 toun.
Ka dau, ontok 28 Ogos nakatalib id jam 3.48 minsusuab, nokotorimo o bogian dau do ruputan nantakan iso kinantakan manakau momoguno dangol om pisau id iso kadai id Plaza Manggatal hiti.
Tumanud dau, pogului kinantakan goduo-duo ‘suspek’ minomoli koropok id kadai dilo om luminabus kawagu id sirang kadai.
“Kalapas naawi minakan, goduo-duo ‘suspek’ suminuang kawagu id suang kadai om pinapalabus do iso dangol om pisau om pinapakakang kumaa pakaraja ih pakaraja.
“Pogului minogidu, nokosiwat ‘suspek’ dino minaganu kiikira 55 bungkus sigup jenama Winston om Dunhill om soginumu tusin tunui kiikira RM200.
“Sumusuut kinantakan dilo, pinapaharo pulis do pinonugkuan kopoompit do duo tiyonon ilo nopo nga id Kakadaian Inanam Baru om Kampung Lobou hiti,” ka dau hiti koniab.
Minoboros Chandra do asil pinonguhatan monoriuk. goduo-duo ‘suspek’ minangakun nokoompit id kinantakan manakau dilo.
Suai ko ilo ka dau, nahau nogi duo talipaun piowit-owit, iso dangol ih ginuno ontok kinantakan, duo kotak sigup jenama Winston, iso motosikal songowian helmet ih nogi kikotumbayaan ginuno montok manakau.
Minoboros isio do goduo-duo ‘suspek’ nogi noilaan ‘positif dadah’ om baino noriman solinaid turu tadau tuminimpuun 6 gisom 12 September 2017 montok ponoriukan potilombus.
Tumanud dau, ‘suspek’ dawaan tumanud Seksyen 395/397 Kanun Koinggoritan. Nung katanu do kasalaan obuli jiilon gisom 20 toun om pasut.
Idsuang ahal dilo, pinosorou di Chandra o tulun ginumuan doulu noh pakaraja kadai 24 jam mooi lobi miingat-ingat miampai tulun di kopotongob.
Ka dau, ponorinaan kadai 24 jam nogi mositi mamasang CCTV montok monulung pulis sokiro ko antakan kaantakan di au au osonong.