Kada koikumai aiso ‘ijazah’
# Ilimu kabaalan lobi pokigunoon do pomorunan
KOTA KINABALU: Pinosorou o sukod tomulok tuh au kopuriman do oikuman aiso ‘ijazah’.
Minoboros ih Montiri Ponombuluian, Koubasanan om Kinoiyonon Posorili Datuk Seri Panglima Masidi Manjun do ilo sabap kosiwatan pakarajaan ih haro timpu diti lobi tuminga doid bogian misosondiri (swasta) om toilalaan.
“Onu ih kiguno id suang kopoposion tokou baino nopo nga kapaganu sijil om nogi miampai toilalaan/kabaalan ih pokigunoon idsuang pakarajaan hinonggo osiliu ihumon ontok timpu diti.
“Nung gulu poh molohing muhang tanak ngawi diolo kapaganu sogulung ‘ijazah’ montok papasanang diolo kapaganu pakarajaan id bogian tulun ginumuan.
“Susuian miagal diti aiso nodi ontok timpu diti sabap nokosimban nodi o pomogunan om sabap pomogunan, masaon nogi pogun sumimban mantad kawo kosiwatan pakarajaan ih kiharo ontok timpu diti,” ka dau.
Noboros dau ahal dilo ontok minanahak boboroson pinotimpuun do ‘Majlis Konvokesyen Sistem Latihan Dual Nasional’ (SLDN) Nayatan Pogun Sabah om Watas Pisompuruan Labuan 2017 hiti koniab.
Minoboros Masidi do nokosigampot noh pogun do rontob kotundaan pomogunan hinonggo tulun ngawi songkoiyonon mositi monimban poingkuro momusorou montok kapaganu do toilalaan/kabaalan montok tumoguang do ponokialitan sistom pakarajaan timpu diti.
“Ontok timpu gulu poh, tantu noh do asanang montok kapaganu karaja idsuang kotorinaan tulun ginumuan sabap molohing papatantu do tanak diolo kalantoi id universiti.
“Nga, karaja id suang kotorinaan tulun ginumuan timpu diti okikit kopio om kokosongan karaja ih haro dilo bulun noh soira kiharo pakakaraja tulun ginumuan kotingkod do kotorinaan maya pinsin toiko karaja wagu ih pinaharo.
“Mositi sumimban tokou mantad kawo poingkuro mogium kosiwatan pakarajaan sabap ontok timpu diti pakarajaan dilo haro id bogian ‘swasta’ toiko sukod tomulok mositi papaharo do pakarajaan sondiri hinonggo sumiliu songulun mongindapu,” ka dau.
Kosokodung kopio isio laang porinta pinapaharo do SLDN montok poposoribau do lobi ogumu sukod tomulok ih haro kabaalan idsuang mogisusuai kaganaan.
“Ilo noh iman-imanon tokou montok mongoput balajaran tokou idsuang mogisusuai kaganaan doulu noh kabaalan ontok timpu diti montok mongulud do tinan mooi kaanu tumounda toririmo.
“Alansan kopio oku do ‘graduan’ ngawi au momili pakarajaan sabap kosiwatan popoburu tinan sondiri dilo toririmo haro,” ka dau.
Namot dilo, Porosiden Koisaan Longkod Pingludaan Kabaalan SLDN Sabah om Labuan, Ani Mohd Ridzuan minoboros do abaabayan dilo nokopongintong do kiginumu 458 graduan mantad Sabah om Labuan tuminorimo sijil nakaawi ponginabasan toilalaan/kabaalan.
Pinatarang dau do sukod tomulok ngawi ih tuminanud do kursus kabaalan dilo kinasib kopio sabap sistom SLDN tumanud do toilalaan/ kabaalan ih pokigunoon di sistom pakaraja timpu diti.
“Suai ko ilo, id suang kursus diti nogi kopoompit do komponi ngawi toiko popoburu do pomorunan dilo sondiri montok manahak kosiwatan kumaa susumikul montok momurimon sondiri pomogunan pakarajaa di tototopot.
“Idsuang ahal dilo, haro pialatan diolo ih osondikot maan onuo kumaraja mantad popoburu pomorunan om haro nogi ih tumimpuun do poniagaan sondiri.
“Mantad dilo, okito tokou SLDN diti kaanu popoburu winakas kikabaalan di pokigunoon,” ka dau.
Nokotindapou nogi id abaabayan dilo nga Kumoduo Speaker Lamin Koundangan Pogun (DUN) Sabah Datuk Dr Johnson Tee, Potunud Bogian SLDN Mohamad Yaacob om Potunud Koupisan Kotundaan Kabaalan Tana Sabah om Labuan Mohd Azmi Pelah.