155 paganakan Kg Bulu Silou nokotoimo sakadai zink mantad kopolintaan BN
KENINGAU: Kiginumu 155 paganakan id Kampung Bulu Silou doiti nokotoimo tohuod sakadai zink mantad kopolintaan Barisan Nasional (BN).
Sakadai dino nopo nga mantad koobian Puu Parlimen Keningau ih pinataak di Monunuat Pulitik Komontilian Vinakas, Teknologi Otomou om Vaig Datuk Daniel Kinsik.
Daniel ih huminansan Kumoduvo Vozoon Montili ih nogi Montili Kotundaan Infrastruktur Tan Sri Joseph Pairin Kitingan mokianu layat id kampung dino nokomoi tu kopomoguno do sakadai polinta dino miampai tavaavasi.
Otumbazaan isido do mimang ogumu projik aplikisin mantad kampung-kampung ih napalai do Tinan Kobuu’on om Koumohigan Kampung (JKKK). Iho onuan dati pongintongan mantad polinta om momuu’an tokou,” ka disido.
Pokionuon nogi disido tu mogiigizon tomoimo minsingubas do sunduvan mogisosokodung daasom montok momogompi pisompuuvan om kohumaagan mogiigizon ngawi kampung dino.
Poguhui id pason dau, Huguan Laan Parti Bersatu Sabah (PBS) Kg Bulu Silou WKAN Ramanus Michael kikahansanan kozo doid mogiigizon tomoimo manaak sokodung kumaa PBS om monokodung kopomuu’an Daniel sokio ko poingkakaton id pomihian tagazo ginumuan ko14 (PRU14).
Pinosogu nogi disido o piipio aplikisin poguhui haid di au nokouhan iho nopo nga hinominon Dewan Mini, galanggang futsal om vokok ih apatut do siminon.
“Ahansan zou tu aplikisin diti kaanu monimbang mahik sabap kounahan diti nopo nga montok kobuu’on kampung diti,” ka disido.
Pokionuon nogi di Ramanus o mogiigizonmooitomoimomisokodung id nunu noopo kapaagatan kampung miaga mogitatabang om miting JKKK.
Nokotindapou nogi id abaabazan dino, Upisol Upis Kotundaan Pituubungan Parlimen Keningau Augustine Nain, Huguan Boogizan PBS Bingkor Peter Jinu Allion, KAN Harry Otigil, Kapitan Peter Ma, Mohoingon Kampung John Lugoh, Poniikon JKKK Jelis Nuing om momuu’an PBS.