Kinantakan taraat noulit kagu
# Songulun nosindualan, walu lamin naraag, taap jeti tulun ginumuan ‘nokotilib’ id Kampung Seri Menanti
BELURAN: Kiginumu 36 lamin nangaraag, kaamung iso ih nopunso sabap kinantakan tongus tologod ih nokoimamang duo kakampungan id bogian kakadaian Beluran, ontok sosodopon tadau Koiso.
Momuruan Kotundaan Rayat (PPM) Labuk Abdul Rahman Haji Kangkawang minoboros do id kinantakan rumasam asapou kiikira jam 5.30 sosodopon dilo, duo kakampungan noimangan kinantakan taraat tongus tologod ilo nopo nga Kampung Air om Kampung Seri Menanti, poingoros Kakadaian Beluran.
Ka disio, kinantakan dilo natadon do 28 walai nakakandai mogisusuai kinaraagan id Kampung Air om walu kagu lamin mogigion naraag, kaamung iso lamin nopunso id Kampung Seri Menanti.
Lamin nopunso ih niyonon di Jamal Kuli, 40-an, songowian paganakan dau nogi natadon do songulun tangaanak kusai (tanak Jamal) nosindualan id tulu om kakod sabap noontok kinababakan soromin ontok kinantakan dilo om pinokiubatan noh sabaagi sumakit labus id Hospital Pekan Beluran.
“Iti kinantakan taraat kinoiyonon (tongus tologod) ih nantakan montok kumoinduo idsuang timpu duo minggu diti id bogian Kakadaian Beluran,” ka disio kalapas minoi intong lamin munggui kinantakan taraat id goduoduo kakampungan dilo kiharo id disan tampat waig bawang sumuang id Bawang Labuk.
Minoboros isio do kinantakan dilo nogi natadon do iso jeti tulun ginumuan id Kampung Seri Menanti noindamaan naraag soira taap dau pinotilib tongus tologod.
“Laang misompuru maan wonsoyo tosisikap di bogian Upis Kotundunan, Upis Adun Labuk om Parlimen Beluran montok monulung munggui nokoompit,” ka disio mikuo mokianu munggui sumikap poposuul do ruputan tosorisid maya do molohingon kampung (KK) kokomoi do kinaraagan lamin di niyonon kaamung momonsoi ruputan pulis.
Minoboros Abd Rahman do id kinantakan kiikira jam 6.05 sosodopon 31 Ogos nakatalib, lobi 20 lamin id Kampung Air om Kampung Keramat hiti naraag sabap kinantakan taraat iso’i.
Uminampai disio minoi intong munggui kinantakan taraat kawawagu dilo nga lansanon Upisor Kotundunan Beluran Joslen Marusin, lansanon Upis Parlimen Beluran James Langa, Boyoon Kampung Air Datu Kumit Datu Damri Molohingon Kampung Seri Menanti Haberin Hassan.
Longkod Upis Pulis Watas (IPD) Beluran ontok romuto Utusan Borneo pinapatantu do nokotorimo noh ruputan kinantakan taraat dilo.