Himo nosinduahan kopoompit duvo padsakazan id Lahan Papar-KK
PAPAR: Himo tuhun nakakandai kinosinduahan mogisusuvai id kohigaganan kopoompit do duvo padsakazan id Lahan Papar-Kota Kinabalu poindoos Kampung Pengalat Besar doiti di tadau Koduvo.
Huguan Balai Bomba om Mongumohig (BBP) Papar, Janil Jaya minoboos do kinantakan jam 12.56 tangadau dino kopoompit do kulita kavo Perodua Alza om lori Nissan Diesel onom tan.
“Asil kinohigaganan natadon di duvo munggui tondu id suvang kulita Perodua Alza kaamung papapanau om susumakai nakakandai kinosinduahan tagaan.
“Tohu tuhun kaamung duvo susumakai id suvang lori nosinduahan nogi om saavi-avi munggui pinaatod doid Hamin Pongusapan Papar montok pokiubatan potihombus kahapas pinolisa di puu EMRS,” ka disido.
Tumanud disido, puu bomba ih nokoikot id tampat kinantakan kahapas dino minomolisi noohu kinohigaganan id talun alun montok papatantu do lahan ngavi kapanau miaga tomoimo.
Ka disido pinapanau kalaja ih nampazat vahu puu BBP Papar om duvo injin dino naavi id jam 1.27 sosodopon.