Kusai nou’u, kulita notutudan
# Tinan au po noihaan om pinaatod doid HQE1 montok pokizazakan monoizuk
PENAMPANG: Songuhun kusai nokito do nou’u id suvang kulita Proton Saga FLX ih notutudan id Lahan Donggongon, poindoos iso restoran ontok minsusuvab koniab.
Huguan Pulis Uvang Penampang Deputi Superintendan Rosley Hobden minoboos do boogizan dau ingkuo po nga au po nokoiho kointutunan munggui ih kikotumbazaan kusai id kinantakan kiikila jam 4.50 minsusuvab.
Ka disido, songia nopo nokoikot pulis id tampat kinantakan, kulita munggui ih kivotik coklat masaon notutudan.
“Kahapas tapu nakaanu minomisok, asil pinomolisaan potihombus id suvang kulita nokoiho do songuhun munggui ih kikotumbazaan kusai nou’u 80 piatus id tampat tikoon papapanau,” ka disido.
Minoboos isio do asil pinongudizan monoizuk nokomoi saasi id tampat kinantakan nokoiko do kinopuian tapui tuminimpuun jam 4.40 minsusuvab poguhui saasi tuminuubung Koupisan Bomba om Mongumohig Malaysia (JBPM) montok momisok kinotutudan.
“Gisom baino diti, tinan munggui ih pinaatod doid Hospital Queen Elizabeth 1 (HQE1) montok pokizazakan monoizuk kakaal au po noihaan. Ingkuo po nga, puu paganakan munggui nokoikot no id Balai Pulis Penampang montok haang potihombus.
“Novit nogi kulita munggui doid Balai Polis Penampang montok haang potihombus,” ka disido mikuo minanamba do kes kinomi sabaagi noduso monigovo.
Namot dino, Huguan Balai Bomba om Mongumohig (BBP) Penampang, Akramin Sakirun minoboos do nokotoimo o boogizan disido do pamahaavan kaagaban kokomoi do kinantakan id jam 4.43 minsusuvab om minonuu sizam puu suminikap minugad doid tampat kinantakan.
“Puu ih nokoikot id jam 4.51 minsusuvab suminikap minonoodo kalaja pomisokan minomoguno kotos vaig mantad injin bomba, om tapui nakaanu minomisok kiikila 15 minit.
“Kulita munggui noumbak 80 piatus om songuhun munggui nou’u kikotumbazaan do papapanau kulita kahapas dino pinataak doid kokuasaan pulis montok haang potihombus,” ka disido mikuo minanamba do naavi kalaja dino id jam 5.35 minsusuvab.