Mongingia mositi apandai momili, limo barangan kakaal id suriba tamangan KPDNKK
RANAU: Komontirian Padagangan Suang Pogun, Koperasi om Kopomogunaan (KPDNKK) kakaal popogirotkuasa do gatang kadai pomolian tongokoodo limo kawo barang kogunoon tikid tadau sabaagi barang tamangan.
Limo barangan dilo nopo nga gula omumuk, tapung, tumau pagansak, bakaang tapui (petrol) om gas dapur.
Potunud KPDNKK Sabah, Yahya Sulaiman minoboros do do momoguno ngawi mositi apandai momili kadai ih papadagang barangan atamangan miampai papatantu do gatang pinongontok au kolobi miagal di pinatatap.
“Sokiro ko haro moniaga ih tomodon popoinsawat gatang barang tamangan diti, om mositi do poruputon ino kumaa KPDNKK,” ka dau ontok minanahak boboroson kopointalangan kumaa mogigion Kampung Kinapulidan om Dewan Mini kampung dilo, hiti.
Pogului, Upisor Koupisan Ahal Poimbida (Jasa) Ranau Maslin Ibrahim id boboroson dau kokomoi kinalantaian, minangamu-amu panandasan wookon tinan ih kaaka do tadau 31 Ogos au oponting montok Sabah om Sarawak, sabap ilo montok Semenanjung (Malaya) noopo.
Minoboros isio do panandasan dilo nopo nga au otopot om pinongomi diolo ih monondos 31 Ogos aiso koompitan miampai Sabah-Sarawak sabaagi ‘buta sejarah’.
“Tokou diti kiharo idsuang iso pogun, iso bondira om 1Malaysia, nokuro haro kagu moningkiwal tadau 31 Ogos sabaagi aiso guno montok Sabah om Sarawak.
“Sambalik dilo, sabaagi rayat Malaysia ih oupus do tana sandad sondiri, nunu noopo karamaian ontok tadau 31 Ogos nangku toiko 16 September kangaam kopio royohon songowian koinsanai rayat Malaysia miampai au mongiro suku tinaru, agama om ‘ideologi’ pulitik,” ka dau.
Minanahak nogi boboroson id abaabayan dilo nga ih Boyoon Koonduan Umno Ranau, Datuk Amisah Yassin om Ponorikohon Panganjur Laurah Galibin.
Abaabayan dilo notindapou di lobi 50 mogigion kaamung Ponorikohon JKKK Sutiman Saimin . Om nakaharo nogi kaunter koporijistaran sabaagi puru momoguno om pinsoputan tiket kinasib.