Kuasaon ‘gajet’ okon ‘gajet’ monguasa dotokou, ka Salleh
KOTA KINABALU: Angatan di Montiri Komunikasi om Multimedia Datuk Seri Dr Salleh Said Keruak o sinakagon tomulok, doulu noh susumikul tuh koponguasa do ‘gajet’ om ‘teknologi komunikasi’ om okon ‘teknologi’ dino nokomoi ih monguasa diolo.
Minoboros isio do kopomogunaan ‘teknologi komunikasi’ kaamung mogisusuai kawo ‘media sosial’ tantu noh do au kaanu mongilag sabap ilo irad ko noubasanan noh miampai sinakgon baino diti nga ilo kopongimbulai doti do kobolingkangan tagayo sokiro ko ilo asalaan momoguno.
“Gajet tototopot nopo nga obuli gunoon montok papalaab do piromutan tokou, popoingkawas ekonomi tokou, momoruhang toilalaan tokou...gunoon tokou ‘gajet’ montok momoruhang ‘rezeki’. iti noh pomogunan aiso piwolitan. Okon nodi irad gulu poh.
“Pomogunan timpu tabantalan misuai doti kopio piagalon miampai baino. Nung au tokou koponguasa dilo odomut tokou doti idsuang kaganaan ekonomi om poniagaan,” ka dau ontok minanahak boboroson id abaabayan Isoginawo id Univeriti Malaysia Sabah (UMS) hiti, koniab.
Nokotindapou nogi id abaabayan dilo nga Timbang Canselor UMS Prof Dr Kamarudin D Mudin.
Tumanud Salleh nung gulu poh, moniga momoguno do ‘premis’ montok moniaga nga baino ‘premis’ poniagaan miagal dilo irad ko au nodi minog sabap poniagaan baino obuli wonsoyon id suang kopoluyungan.
Mantad dilo, ka dau sinakgon tomulok mositi karati do koingkokoton isan timpu om sumirot osodu doid tigulu kokomoi do kosimbanan ngawi di antakan ontok timpu rumikot kaamung korikohonon pogun diti 30 toun timpu rumikot miagal kopokionuon tumanud ‘Transformasi Nasional 2050’ (TN50).
Ka disio kararalanon pomusarahan ih lumansan noopo do kosiwatan ngawi pakarajaan di posodiaon id bogian tulun ginumuan mositi simbanan sabap kosiwatan ngawi pakarajaan irad dilo ontok timpu rumikot au nogi miirad miampai baino.
Sambalik dilo, tumanud disio sinakagon tomulok mositi papalaab do pomusarahan om monoinu do kosiwatan ngawi pakarajaan id labus mantad koubasanan om teknologi komunikasi obuli gunoon tososonong montok tujuan dilo.
Id abaabayan dilo suminaasi nogi ih Salleh do pinisainan ‘Memorandum Persefahaman’ (MoU) pialatan UMS om Koupisan Kosolimbaan Malaysia montok popoingkawas om papalaab do pisokodungan id suang kaganaan kosolimbaan, koponuratan om ‘teknikal’.
UMS linansanan D Kamarudin om Koupisan Kosolimbaan Malaysia linansan di Boyoon Potunud dau Datuk Abu Bakar Ab Rahim.-Bernama