‘Hak’ Sabah, Sarawak pogiboboosan miampai tototopot
TUARAN: Kopolintaan Pisompuuvan tomoimo papatantu do potitikid kapatantuan ih kopoompit do kogunoon totopot om ‘hak’ Sabah om Sarawak pogiboboosan miampai tavaavasi kaamung no mokinongou atag (tuva pomusaavan) mantad montili Kabinet mantad goduvo-duvo pogun dino nokomoi, ka di Montili id Koupisan Huguan Montili Datuk Seri Abdul Rahman Dahlan.
Moboos doid monunuat abal doiti koniab, minoboos isido iti montok papatantu do potitikid koputusan di onuon dino otootopot kapanaak asil tavasi suvai ko kopomogonop do kopokionuon layat id goduvo-duvo pogun.
Ka disido Huguan Montili Datuk Seri Najib Tun Razak nogi kikoinsamadan miampai papatantu do ohou om tuva pomusaavan koinsanai 12 montili pisompuuvan, sanda-daau onom mantad Sabah om onom mantad Sarawak, kinongoon om nonuan pongintongan.
“Obuli zou nogi moboos doiti do kivaa piipio kalatas om koputusan Kabinet (kopoompit do ‘hak’ om kopontingan Sabah om Sarawak) ih au dagai toimoon om kinootuson dino ginazat mahik di Huguan Montili toi pinopohuntan do koputusan dino...au insan nantakan poguhui diti.
“Nung kivaa ahal kopoompit do ‘hak’ om kopontingan layat Sabah, zikoi (montili mantad Sabah) manaak tuva pomusaavan (atag) miampai kivaa tivou tumongob toi oosizan sabap koiho zikoi do kinongoon di Huguan Montili do onu noopo tuva pomusaavan layat Sabah ih hinansanan mantad dagai.
“Mamajamin zou, aiso dati koputusan kopolintaan (Pisompuuvan) kopoompit do ‘hak’ om kopontingan layat Sabah, ih au pinogibabaasan miampai totootopot,” ka disido ih sinoomo kahapas pinotimpuun do Abaabazan Mamabak Tana Projik Panadaan Sunsuzon Bavang DamitKakadazan Tuaran, doiti koniab.
Idsuang ahal dino, pinosoou nogi di Abdul Rahman o layat Sabah toi Sarawak mooi au manganggap kopolintaan Pisompuuvan sabaagi kopolintaan montok Semenanjung noopo, katapi iho nopo nga kopolintaan Malaysia miampai Sabah om Sarawak nogi kivaa ohou ih agazo kozo montok papatantu do ‘hala tuju’ kotundaan pogun.
Minaganu suntu panadaan Talun Alun Tagazo Pan Borneo, minoboos Abdul Rahman do miampai kokuatan sokodung layat id Sabah om Sarawak kumaa Barisan Nasional, kopolintaan pinopoobi do soginumu RM30 bilion montok papahantoi do talun alun tagazo miampai aiso ‘tol’ dino.
“Iti nopo nga vava Huguan Montili doid kokuatan om kosompuuvan ohou tuhun Sabah om Sarawak daasom tokou papavakas Malaysia,” ka disido.