EPF manakadai tuhun Malaysia monoina do usin pinoopi maza do RAS
KOTA KINABALU: Nung momiumon ko do ahaid po timpu do kopinsinan, pomundom no kavagu. Minamason ih mononsunud kousinan do kapamalanan kopinsinan nopo nga au monutun nung ahaid po timpu toi ko au.
Oinsanan nga koiho do usin pinoopi doid EPF nopo nga misondikot kahabus songian do ogonop umul 55 toun. Poingkuo po nga noihaan do kivaa 65 piatus mantad toinsanan kiumul 54 toun, kivaa po noohu poingopi id siibo do RM50,000.
Ii nopo koundoonok kozo nga kogumuan pinopoopi doid EPF, koubasan no dioho do magavi toinsanan usin notimung poompus tohu toi ko himo toun ahapas ogonop umul 55 toun.
Montok monguhan do kobohingkaangan diho, minaganu oh EPF do haang montok manaak kosivatan kumaa toinsanan tuhun Malaysia montok monoina do usin pinoopi diho maza do Kotoinaan Pononsunudan Kopinsinan (RAS).
RAS nopo nga iso haang do EPF manakadai, okon ko kopoopuan montok mamalan do kousinan kopinsinan mongoi do kotounda nodi kozo izioho tumoguvang do kopinsinan tumanud pongitanan do EPF.
RAS nopo nga manaak kopiumanan om toihaan kokomoi do kapamalanan kousinan do kopinsinan.
Kapanaakan kotoinanan aiso kabalai nopo diti nga manaak oh RAS do kopoihaan montok manakadai puu ngavi dau montok maganu kootuson di pointunud.
Ontok pinopoiho kuminaa kapaabalan The Borneo Post, minoboos ih mononsunud kopinsinan EPF, Janaith Lee do tumanud puku poingopi, sosonguhun dii apatut do kivaa poingkuukudi no do RM228,000 id suang do EPF. Miampai ginumu diho, agazo kahansanan do kaanu nodi izioho manakadai koposizon pinsin songian do ogonop umul 55 toun.
“Ginumu do puku pinoopi doid Akaun 1 do EPF nopo nga natantu tumanud do umul mongoi kogonop nodi oh pakaakalaja di monimung poingkuukudi no do RM228,000 doid suang EPF songian do oikot umul 55 toun.
“Sabaagi poombitanan, songian ogonop do umul 25 toun, apatutu nodi kozo do kivaa RM14,000 poingopi doid Akaun 1,” ka di Janaith.
Pinopointahang nogi isido do puku poingopi nopo nga tumanud gaji pakaakalaja sokuukudi no do RM950 sombuhan.
Nuhudan ginumu do usin puku poingopi nopo nga okito maza do internet www.kwsp.gov.my miampai koponguntaban poimbida ih kaanu manakadai mongiho do ginumu usin koopi.
“Kalahanon monguntob do EPF nopo nga manakadai mongiho nung songkuo usin otimung songian do oikot umul 55 toun. Mantad diho, oihaan nodi kozo nung kogonop do puku poingopi RM228,000,” ka di Janaith.
Koponguntaban nopo dii nga papaamung nogi toinsanan kopoihaan kokomoi do umul, kopisaamaan do umul kopinsinan, gaji timpu baino om susuvai po.
Sundung nuhudan ginumu kousinan puku poingopi dii nopo nga kopotunudan toomod, pinopointahang ih Janaith do apatut nogi kozo do kogonop oh pakaakalaja gontob puku poingopi songian do oikot umul pinsin.
“Toi ko avasi nogi kozo nung kivaa usin poingopi doid suvai pinoopian mongoi do au nodi kozo oindamaan humansan do usin pinsin mantad EPF,” ka dosido.
Miampai umul kopinsinan 55 toun, manaak oh EPF do kalahanon monoina do usin poingopi. Kalahanon diho nopo nga manaak pihi kumaa di nokopinsin montok monoimo do usin tikid vuhan toi ko piipio ginumu do insan pohobuso mongoi kogonop nodi oh usin poingopi do gunoon dioho poingompus timpu tana’u.