Kapamalanan tavasi montok mongivad kobohingkaangan kousinan
KUCHING: Kapamalanan kopoopian usin doid EPF nopo nga iso kalahanon mongivad kaantakan tuhun Malaysia do kotoguvang kobohingkaangan kousinan, saasabap no do kogumuan pakaakalaja di toun nakatahib au nokoikot do RM50,000 poingopi doid EPF.
Tumanud di upisol Kotoinaan Mononsunud Kopinsinan (RAS) Kuching, Ronney Khairuddin do kaantakan miaga diho nopo nga koundoonok kozo sabap no do kogumuan tuhun Malaysia nopo nga koguno do poinggumu ko iho songian do oikot timpu kopinsinan.
“RM50,000 nopo nga au kogonop montok pongusin koposizon poompus 20 toun mantad umul kopinsinan gisom umul 75 toun,” ka dau.
Pinopointahang isido diho di ontok panaak pononsunudan kokomoi do ‘Kotoinaan Mononsunud Kopinsinan – Haang nu montok kopinsinan pinalan do EPF’ nakapanau doiho id Kuching di ontok 2223 Julai toun diti.
Iho nopo nga kaantakan id douvi do kododizan Malaysia sabaagi do iso pogun nohoing, ka vagu dosido.
“Sundung po tu do umul kopinsinan doid Malaysia nopo nga 60 toun, kakal kaanu oh pakaakalaja popoopi kousinan doid EPF gisom do umul 75 toun. Montok diho mongunsub zikoi kumaa pakaakalaja tumihombus popoopi mongoi kotoimo nodi do kounalan.
Pokionuon oh puu do EPF hobi no kozo tinimungan sinakagon ‘sandwich’, do au daa papahabus usin pinoopi montok papagazo tanak om nogi manamong do mohoing.
“Tanak kakal humansan diau, naamot diho mohoing nga poinhansan diau, kaantakan diho popoizon diau doid taatanga miampai minamadadi diau do sinakagon ‘sandwich’. Montok kaantakan miaga diti, ondomon no kozo oh kopomogunaan usin om bii’on no kozo nung kogonop ko do usin doid umulan nu,” ka di Ronney.
Mantad diho minanaak isido pongunsuban montok papahabus usin monikid vuhan om okon ko insan-insan pohobuso, tu “usin doid EPF nopo nga oumohig kozo”.
Kotoinaan Monunsunud Kopinsinan EPF nopo nga somboogizan do palan tosodu do EPF montok manakadai puu ngavi momodimpot do usin kogonop ontok timpu do kopinsinan, hobi no kozo kumaa di kopinsin do toduuk diti toi ko ih nokopinsinan no di kavavagu.