KWSP mositi tumanud SOP ogiot poguhui papaapu id habus pogun
ALOR SETAR: Tinimungan Usin Pinoopi Pakalaja (KWSP) mositi tumanud do ‘prosedur operasi standard’ (SOP) ogiot poguhui pakavasaon papaapu id habus pogun sumusuut koikohon dino sabaagi poingigit kuasa kousinan kopinsinan poinvaavasi id pogun diti, ka di Kumoduvo Montili Kousinan Datuk Othman Aziz.
Minoboos isido do kitonggungan KWSP papatantu do potitikid kapaapuvan ih todoon nopo nga kapadan om kosudong miampai palan pongindapuan ih koimpupuson dino kapanaak asil kumaa papaapu id okitonan ‘dividen’.
“KWSP om Khazanah Nasional Bhd nakahaid no pinapaapu id habus pogun, okon ko id Amerika Syarikat noopo sabap iho nopo nga somboogizan mantad haang (strategi) korporat dosido montok papatantu do ‘portfolio’ kapaapuvan kaanu papaadang,” ka disido kahapas minoi intong projik Pamalanan Pangantaban Hizud Bavang Kedah/Anak Bukit id Kampung Kelonchor doiti koniab.
Noboos disido ahal dino kumaa monunuat abal ontok pinokianu minongomi pongimbaasan gugumaga kokomoi do kapaapuvan Khazanah Nasional om KWSP id Amerika Syarikat di kavavagu.
Huguan Montili Datuk Seri Najib Tun Razak id kotumbuhuzan kalaja doid Amerika Syarikat di kavavagu diti pinopoboos do kokomoi pamalanan KWSP om Khazanah Nasional montok popoingkavas do kapaapuvan dioho id pogun dino om koputusan Malaysia Airlines Bhd montok momohi 16 kapal Boeing idsuang timpu toduuk.
Gisom baino, nakapaapu no KWSP do soosomok US$ 7 bilion mantad kavo ‘ekuiti’ id Amerika Syarikat, om Khazanah Nasional, ih kivaa upis id Silicon Valley, California, nakapaapu no kiikila US$400 lizong id suang komponi teknologi takavas.
Minoboos Othman do goduvo-duvo agensi dino mositi apandai mogium mogisusuvai kavo kapaapuvan kopompit do kapaapuvan kinoizonon, ASEAN om sompomogunan ih okon noopo kopoompit do kopomohizan saham katapi nogi maza kaampazatan idsuang projik ngavi tagazo om pomohizan ‘bon’.
Idsuang ahal dino, pinatahang disido do panandasan vookon tinan kaaka do kotumbuhuzan kalaja Najib doid Amerika Syarikat poguhui diti sabaagi iso mantad kalaja montok monuhung pogun dino, nopo nga au otopot kozo.
“Isai tokou mimang monuhung Amerika Syarikat, monuhung naku miampai RM100 bilion om otopot nopo ekonomi Amerika nokosigampot trilion (dollar)... onu ih kiguno nga maganu tokou kosivatan kapaapuvan di obuli manaak kouhian kangaam.
“Miampai ‘purata’ suntu dino nung kouhian kinoizonon (KWSP) idsuang tohu gisom apat piatus, om kahapas dino uangan nogi miampai kouhian id habus pogun idsuang 11 piatus...ginumu diti no ih pataakon mahik doid papaapu id okitonan ‘dividen’ tounan,” ka disido.
Pinokianu minongomi panandasan vookon tinan kaaka do kotumbuhuzan Najib doid Amerika montok momogonop do ponoizukan Koupisan Keadilan Amerika Syarikat (DOJ) kikoompitan 1Malaysia Development Berhad, minoboos Othman do iho nopo nga somboogizan ‘persepsi’ ih pinoimbuhai di boogizan ih ‘momivogu’ miampai pisomoan id piahatan Najib om Polosiden Amerika Syarikat Donald Trump.
“Poguhu izioho ka Najib oosizan tuhok takod doid Amerika Syarikat sabap koosi au dati koguhi (doid Malaysia). Baino iti songian isido (Najib) nakaanu pagahapan mantad Polosiden
Donald Trump sondii, momivogu nodi izioho,” ka disido.
Minoboos isido nombo dati Malaysia om Amerika kaanu popitongkizad mantad kavo pituubungan koumohigan, kapaapuvan om ekonomi sabap do goduvo-duvo pogun nadadi no kouvang dagang avasi kozo mantad po di napadan toun di nakatahib.
Sabaagi polinta ih kitonggungan, minoboos Othman do kuminam Malaysia minggisom mamagazat soginumu obuli papaapu songkosuvazan doid pogun diti om id timpu iso’i nogi papahaab vagu kapaapuvan id habus pogun montok asil pogun om layat.Bernama