Pulis minanalasai 10 kes # Turu ‘suspek’ ginakom kopoompit kes manakau padsakaian, harata kakamot om mamagamu kigatang lobi RM90,000
SANDAKAN: Pulis Sandakan nakaanu minanalasai 10 kes manakau padsakaian om manakau harata kakamot kigatang lobi RM90,000 sumusuut pinanahanan turu kusai mantad podi kotimpuunon wulan diti gisom kosodop.
Boyoon Pulis Watas Sandakan ACP Mohd Azhar Mohd Hamin minoboros do ‘suspek’ kiumur pialatan 21 om 42 toun dino nokomoi ginakom maya onom ‘operasi’.
Nahau nogi pulis 31 barangan, iso korita ih kikotumbayaan pinanakau om iso korita ih gunoon montok kaparagatan koimaan taraat tinimungan dilo, ka dau id pitimbungakan abar, hiti koniab.
Minoboros isio do koinsanai ‘suspek’ tulun kinoiyonon dilo nogi ‘positif syabu’.
Namot dilo, minoboros isio do minamagahau pulis do tusin tunui RM10,365 om minanaan songulun kusai kiumur 39 toun ih kikotumbayaan nokoompit pimpukiauan id koluyungan maya do pinonugkuan id iso kadai kopi id Ralan Prayer, kakadaian Sandakan, kosodop.
Ka dau premis dilo kikotumbayaan gunoon montok tiyonon momuhu tusin mantad ejen montok pimpukiauan maya koluyungan kawo SCR888.
Minoboros isio do kadai kopi dilo nopo nga premis kaapat id watas diti ih sinugkuan sabap siniliu do tiyonon kaparagatan ‘judi’ maya koluyungan.
Minongomi kes misusuai, noboros di Mohd Azhar do nakapanahan nogi pulis do duo kusai ih kikotumbayaan nokoompit id suang kaparagatan kikoompitan dadah id bogian ‘setinggan’ Kampung Forest, kosodop.
Pinomorisaan kumaa goduo-duo ‘suspek’ kiumur bindurugan 40-an dilo nokokito do 11 paket plastik tokoodo kikotumbayaan do kisuang dadah kawo syabu, ka dau. -Bernama