SPR mogium panalasaian montok pongundi nokorijistor ih haro ahal montok mongundi
BANGI: Masaon do Tinan Monorina Pomilian Tagayo (SPR) mogium panalasaian montok popomilo do pongundi nokorijistor ih pakaraja idsuang kaganaan osusa om au kopongundi sabap kopokionuon karaja.
Ponorikohon SPR Tan Sri Mohd Hashim Abdullah minoboros do rumuba o bogian dau miampai lansanon mantad piipiro agensi miagal Komontirian Kolidasan om Koupisan Bomba om Mongumolig minggu tabantalan kokomoi do ahal dilo.
Pialatan pakarajaan di au kaanu tumongkiad tampat karaja ontok tadau mongundi nga dokutur om mongungubat (jururawat) ih pakaraja id bogian pongubatan osorisid lamin pongusapan, papapanau ambulans om pakaraja id jijiilan, ka dau.
“MuhangSPR papatantu do toinsanan rayat Malaysia ih nokorijisto noh sabaagi pongundi kapaganu kaadilan montok mongundi ontok tadau mongundi,” ka dau kumaa monunurat abar kalapas abaabayan Balajaran Pongundi id Karaja ngawi Pomilian Tagayo montok Institut Balajaran Mongingia (IPG) id IPG Kampus Balajaran Silam hiti koniab.
Kokomoi koposodiaan pomilian tagayo ginumuan (PRU) ko-14, noboros di Mohd Hashim do koposodiaan SPR mantad kawo ‘fasiliti’ om ‘logistik’ baino id rontob tosonong om poposodia nogi palan di au oilaan koimbulai sokiro ko antakan lumiud.
“SPR magandad timpu PRU-14 noopo. Haro pogun ih nokosodia noh 96 paratus haro ih 85 paratus,” ka dau.
Minoboros isio do gontob parlimen ih pinili maya do PRU-13 opupusan ontok 24 Jun 2018 om parlimen kolosod doti miampai sondiri nung ino au bubaron pogului tadau dilo.
Gisom suku koduo 2017, kiginumu 14.6 riong rayat Malaysia nokorijisto noh sabaagi momili, ka dau.
Minoboros Hashim do mantad podi Abaabayan Balajaran Pongundi miampai ‘intensif’ tinimpuunan ontok Februari nakatalib, kiginumu 25,000 tulun nokoompit noh om 2,445 pomili kawawagu nakaanu pinoporijisto.
Montok abaabayan kumaa puru IPG, minoboros isio do mokiririkot SPR do kaampayatan 9,000 posodia momo’iaid pointongkop pogun om abaabayan dilo nakapanau noh id onom tinan IPG.
“Kiguno montok potitikid mongingia om posodia sumiliu mongingia kapaganu pangaratian om kopointalangan di totopot kikoompitan pomilian tagayo pogun mooi kopoindalanan kapanahakan ilimu kikoompitan ahal pomilian tagayo idsuang ‘modul’ kopogunan kaanu poporikot kumaa susumikul miampai otopot kopio,” ka dau. -Bernama