Padamaan aiso koimpupuson # Mositun minangazou sunduvan avakas bagas Adun Matunggong
MATUNGGONG: Monunuat Tagazo Parti Pisompuuvan Sabah (PBS) Hongkod Datuk Johnny Mositun minamahazou sunduvan avakas Huguan Boogizan PBS Matunggong ih nogi bagas ADUN Matunggong, Sarapin Magana ih naaha id pomihian tagazo ginumuan (PRU) nakatahib, nga kakaal oupus om monokodung parti om kopolintaan Barisan Nasional (BN).
Ka disido, sunduvan miaga diho no ih pokionuon kozo doid puu ngavi parti pikouvangan sabaagi suntu doid sinakagon timpu mikot songian nokopinsin nodi mantad kaganan pulitik.
Tumanud disido, popindaama do agenda parti om polinta osodu po om aiso koimpupuson om ogumu kaantaban dino.
“Sabaagi momuu’an timpu baino diti, sokio ko au opulokis ginavo tokou tantu no do au tokou kaanu sumaan tonggungan di pinataak dino.
“Mantad dino, id kosivatan diti magangat zou kouvang ngavi puu parti idsuang pikouvangan BN tu mogisosokodung monuhung iso miampai suvai om tomoimo monoodo pihion ih tavasi kozo montok popotounda songovian pogun tokou di koupusan diti.
“Poposoou zou nogi tu saavi-avi puu parti pikouvangan BN au asanang otombilangan mantad pokiinsianan boogizan gugumaga ih tomodon mimang mogium kahasaan momuu’an om polinta mooi tumanud lahan dosido ih au po atantu obuli monuhung layat koinsasanai,” ka disido.
Isido ih nogi Kumoduvo Speaker Hamin Koundangan Pogun Sabah om Huguan PBS Boogizan Pantai Manis minoboos ahal dino id abaabazan pinonimpuunan Pitimbungakan Tagazo Insan-Insan PBS DUN Matunggong om Tanjung Kapor id Dewan Poingukab Matunggong.
Poguhui, Huguan Boogizan PBS Matunggong Sarapin Magana minoboos, sundung tu naaha isido id
Mositun, Sarapin, Anita om ih suvai moninsib ‘kek’ kinouhiton toun PBS Matunggong ko-32.
pomihian tagazo nakatahib nga isido tatap minggisom kumalaja monuhung PBS popotounda Matunggong.
Ka disido, PBS DUN Matunggong pinuuvan kiikila 10,200 puu mantad 151 laan ih nokolijisto naaha ontok PRU nakatahib sabap do mimang kuminam toiso-iso ih kawawagu nga au minomusoou kobohingkaangan dino.
“Layat Matunggong au kosudong moboos kopolintaan BN au avasi. BN nopo nga iso parti om polinta ih poinvavasi piagahon gugumaga.
“Idsuang ahal dino, mozo pitimbungakan diti mokianu zou doid kouvang ngavi idsuang PBS Matunggong tu au monguhit kosilapan dino sabap iho papahaid noopo do kopoindahanan popotounda uvang toniini diti doid iso uvang noponu ih koponokiahit id onu noopo,” ka disido.
Nokotindapou nogi ih Panakadai Montili Kotundaan Layat om Ahal Momoguno ih nogi Adun Tandek om Huguan Koonduan PBS Hongkod Datuk Anita Baranting, Timbang Polosiden ih nogi Huguan PBS Boogizan Pitas ih nogi Poniikon Atatap Pitimbungakan PBS Boogizan Matunggong Dato’ Ng Loi Tect, Huguan Kopoihaan PBS Hongkod ih nogi Huguan Boogizan PBS Tamparuli Datuk Jahid Jahim om Huguan Pulis Uvang Kudat Supt Douglas Taong.