Kotundaan Sabah momoguno pisokodungan togirot kusai, tondu- Musa
KOTA KINABALU: Kotundaan Sabah momoguno do pisokodungan togirot rayat, kusai nangku toiko tondu, ka di Boyoon Montiri Sabah Tan Sri Musa Aman.
Montok dilo, minoboros isio do koporintaan pogun aiso koulalahon awagat sampaping montok mangalantik sosongulun mongigit karaja kiguno idsuang porinta, kaamung mantad tinaru koonduan montok papatantu do abaabayan kotundaan pogun papanaon miampai oulud om osonong.
“Au oku awagat sampaping. Au oku mosi-rosi montok manahak karaja kiguno (idsuang koporintaan pogun) kumaa isaiisai noopo tumanud do koulalahon ginawo sosongulun.
“Om, aiso kobolingkangan do koporintaan pogun montok manahak do kosiwatan salab-laab kopio kumaa koonduan id Sabah sabap otumboyo tokou do koonduan nogi obuli monoluod doid kopotundaan pogun iso’i miagal tinaru kusai,” ka dau id abaabayan kapangaramitan Tadau Koonduan nayatan pogun hiti sodop koniab.
Minoboros Musa do koporintaan pogun toririmo minggisom papatantu do tinimungan koonduan id Sabah koponokialit om haro kobulihan om koponginwaguan di takawas tuh au oiduanan idsuang kotundaan togumu.
Kotumboyo isio do kuasa koonduan nogi kiguno montok papawakas kagu abaabayan Transformasi Nasional 2050 (TN50) tuh sinakagon timpu rumikot lobi opurokis.
Pogului, Montiri Kotundaan Mogigion om Ahal Momoguno Pogun Datuk Jainab Ahmad Ayid minoboros do komontirian dau maya Koupisan Ahal Koonduan (Jhewa) pogun pinapaharo do Abaabayan TN50 Koonduan Sabah ontok 29 Ogos nakatalib montok monimung iman-imanon rayat montok papawakas tinimungan koonduan.
“Abaabayan diti mongukab ahal ngawi tagayo ontok timpu tabantalan koonduan Sabah rumikot 2050 om mongilo nogi do atag montok poposigampot do imanimanon koonduan Sabah rumikot TN50,” ka dau.
Id abaabayan dilo, pinapatahak ih Jainab do surat TN50 Koonduan Sabah kisuang atag papawakas do koonduan Sabah ontok tabantalan kuminaa Musa montok ponimbangan porinta.
Pinotimpuun nogi ih Boyoon Montiri do abaabayan kopongindapuan ‘Creating Millionaires Among Young Women Entrepreneurs’ (Cream) doulu noh montok kopotundaan mongindapu koonduan tomulok id Sabah gisom opungaranan ‘jutawan’.
Kopinamot pangaramitan dilo, onom tingadan (anugerah) pinatahak kumaa koonduan Sabah kinangaian tosonong, iyolo nopo nga ih Datin Seri Siti Rubiah Abdul Samad, ih nogi sawo di Montiri Labus Datuk Seri Anifah Aman, ruminamit ‘Anugerah Ikon Wanita’ sabap kinoomungan dau idsuang kaparagatan kotulunan ngawi doulu noh kikoompitan ‘psikologi’ om bagas Luyar Tagayo Pogun Datuk Mariati Robert (Anugerah Wanita Terbilang).
Nokotorimo nogi tingadan nga popotulud kapal Tentera Udara Diraja Malaysia Mejar Patricia Yapp Syau Yin (Anugerah Wanita Cemerlang), mongindapu ih minampayat kapangasilan tumau ‘aromaterapi’ om pamansaian Marina Harris Embiricos (Anugerah Usahawan Wanita), mongingindapu id kaganaan pongolumisan Sahrah Asor (Anugerah Usahawan Wanita Harapan) om Koisaan Tina Tosongulunan Norqaseh Kinabatangan (Anugerah Persatuan Wanita Cemerlang).-Bernama