Maganu haang kivaza: Masidi
# Monguhan kobohingkaangan pangazamutan id Bavang Moyog
PENAMPANG: Pokionuon di Montili Ponombuhuzan, Koubasanan om Kinoizonon Posoihi Sabah Datuk Masidi Manjun o koupisan kikoompitan maganu haang miampai kivaza montok monguhan kobohingkaangan kinozamutan id Bavang Moyog sabaagi haang papatantu do kabaakasan bavang dino tomoimo ogompi.
Minoboos isido do ahal om kobohingkaangan kazamutan vaig id boogizan poindoos Bavang Moyog okitonan kakaal po koinggazo om asaasau kahabus id abal kinoizonon.
“Piahatan natadon tototopot kazamutan vaig Bavang Moyog nga kapataaman sizamut ngavi, vaig ih noguno no, bakaang pangazamutan mantad pomounan pomutanaman suvai ko papataam ‘efluen’ mantad kapaagatan pongilangan.
“Mantad dino, haang totootopot mositi todoon do koupisan kikoompitan miampai misokodung tuhun ngavi songkoizonon montok monoodo ponimbanan om papatantu do Bavang Moyog obolisi,” ka disido ontok minanaak bobooson pinotimpuun do Kalamazan Bangkar nazatang uvang Penampang kopinamot Tadau Bavang Sompomogunan id Jeti Kampung Terawi, doiti koniab.
Teks pason dau binasa di Panakadai Montili Ponombuhuzan, Koubasanan om Kinoizonon Posoihi Sabah Datuk Pang Yuk Ming.
Kalamazan Bangkar (Pesta Rakit) ih pinapanau sohinaid duvo tadau tuminimpuun songkosodop dino nopo nga pinajul songovian Upis Uvang Penampang,
Pang (tanga), Donald (vanan) om Luvita (gibang) nokoikot id abaabazan dino minomoguno bangkar.
Koupisan Pangavaigan om Kohuzungan Sabah, Tinan Kobuu’on om Koumohigan Kampung Uvang Penampang om Community-Led Environmental Awareness for our River.
Minoboos Masidi do kopoompitan Koupisan Pangavaigan om Kohuzungan Sabah id kalamazan dino nogi kaanu monuhung kalaja ngavi kapambaakasan bavang, om nogi kaanu popokito do kotopotan koupisan polinta daasom kopomogompizan Bavang Moyog.
Mogisusuvai abaabazan kagazat piniboi’an poompus kalamazan dino nakapanau kaamung no piboi’an mamangkal poing pinogingo ih nokopongintong do soginumu 16 tinimungan, sanda-daau 10 montok boogizan mogiigizon om onom montok boogizan koupisan polinta om tinan okon polinta.
Nokotindapou nogi id abaabazan dino nga Upisol Uvang Penampang, Luvita Koisun, Poniikon Barisan Nasional (BN) Penampang Datuk Donald Peter Mojuntin, Huguan Umno Boogizan Penampang Datuk John Ambrose om tombuhui tapantang ih suvai.