BN pinopotounda PI1M soosomok id toinsanan watas id Sabah, ka di Hamisa

TAWAU: Nokotounda noh do koporintaan Barisan Nasional (BN) o Longkod Internet 1Malaysia (PI1M) soosomok id toinsanan watas id Sabah mantad podi tinimpuunan pinointutun id toun 2012, ka di Panakadai Montiri Kotundaan Kotos om Koburuon Teknologi Kopoilaan Sabah, Datuk Hamisa Samat.

Ka dau, PI1M pogului diti nointutunan sabaagi Longkod Garis Alaab Mogigion (Pusat Jalur Lebar Komuniti) ih pinaharo mantad podi 2010 miampai potitikid watas kiharo duo toiko tolu linominon longkod garis alaab montok monulung popoingkawas konuonuan (ekonomi) mogigion ngawi songokoiyonon maya do kounalan dilo.

“Nokoilo tokou noh, do PI1M nopo nga laang porinta popoinsomok do piwolitan ‘gigital’ id pialatan rayat doulu noh mogigion labus kakadaian,” ka dau ontok pinotimpuun do Longkod Internet 1Malaysia (PI1) Kampung Merotai Besar doros hiti, koniab.

Ka dau, kounalan komputer dom internet ih pinosodia do porinta dilo obuli gunoon do mogigion montok papalaku do asil kakamot kapalabusan ih poburuon doid dagang di lobi alaab om monulung tinimungan tomulok doulu noh susumikul kapaganu do kopoilaan maya longkod dilo.

“Sabaagi suntu nung id Kampung Merotai Besar diti, haro kakamot kapalabusan kinoiyonon miagal kakamot tinunturu, taakanan kinoiyonon, obuli tokou maganu video toiko gambar om poposuang id Facebook PI1M mooi toinsanan pomogunan koilo, onu kawo taakanan toiko asil kakamot kapalabusan ih kiharo id watas Tawau diti,” kawagu dau.

Hamisa ih nogi lansanon rayat Tanjong Batu dilo minoboros do poposodia nog PI1M do mogisusuai kounalan suai kamaung noh manaap om momonsoi salinan surat om nogi popointutun do poniagaan id kopoluyungan miagal ‘e-usahawan’ om ‘ e-rezeki’.

Namot dilo, pinosorou nogi di Hamisa o0 momomoguno tuh au kasala momoguno internet ih pinosodia do porinta sabaagi longkod pibabakan, poposuang kopoilaan au otopot om popibabak ngawi pisompuruan tinaru miampai abar di kopongorosi rayat.

“Laang tinan di aiso tonggungan kasala momoguno do kounalan Internet montok popibabak ngawi do pisompuruan kumaa tulun ngawi mantad podi tohuri noh diti ih kopongorugi diolo noopo om obuli momiraag pogun,” ka dau. -Bernama