Aiso ralan tasanang: Sapawi
# Tulun ngawi mositi ia’on montok au monorimo susuap om kasala momoguno kuasa
SIPITANG: Aiso ralan tasanang montok momodimpot kalantaian tagayo idsuang kopoposion, suai mantad minggisom om kumaraja miampai noponu kotopotan, ka di Puru Parlimen Sipitang Datuk Sapawi Ahmad.
Idsuang ahal dilo, pokionuon disio o tulun ngawi tuh onuan do balajaran om kopurimanan montok mongilag om au monorimo koubasanan susuap toiko kasalaan momoguno kuasa.
“Montok momodimpot iso kalantaian tagayo idsuang kopoposion kotulunan ngawi, au minog maganu ralan asanang sabap ilo kopogowit doti do ponginaman lobi agayo. Koubasanan kotopotan ginawo mositi poguluonon montok Malaysia osiliu pogun koburu om koidu mantad kaparagatan susuap,” ka disio.
Noboros disio ahal dilo ontok romuto kalapas minamaramai do tinimungan ‘Program Kembara Jelajah Anti Rasuah’ 2017 (Kejar
17) pinanjur do Tinan Monorina Pomunsaan Susuap Malaysia (SPRM) id Kakadaian Sindumin, hiti di tadau Koonom.
Kiikira 1,000 mogigion songkoiyonon nokotindapou abaabayan dilo.
Nokotindapou nogi ih Panakadai Montiri Ponombuluian, Koubasanan om Kinoiyonon Posorili ih ponogi ADUN Lumadan Datuk Kamarlin Ombi, ADUN Sindumin Datuk Ahmad Bujang om Potunud SPRM Sabah Datuk Sazali Sabli.
Mogisusuai abaabayan pinaharo kopinamot abaabayan dilo.
‘Konvoi’ tinimungan kimotosikal kuasa tagayo dilo pinoidu mantad Kagayaan Kompleks Ponorinaan Koporintaan Koporintaan Sabah (KPKPS) id jam 6.30 kosuabon om minumbaya id Papar pogului pinohibokan kawagu doid Membakut, om Beaufort om nopupusan id Sindumin.
Sapawi ih nogi potunud Yayasan Sabah minoboros do kosokodung kopio o bogian disio kinapaharaan do abaabayan Kejar 17 dilo ih kigaab montok paparayat do SPRM, montok monuduk om manahak kopurimanan kumaa tulun ngawi.
Ka disio, toilalaan id pogun ngawi nokoburu mositi silihon do pomitanan do naamot Malaysia lumaang doid Transformasi Nasional 2050 (TN50).
Namot dilo, minoboros ih Sazali do abaabayan Kejar 17 dilo nokosigampot iman-imanon om pokimamaan poompus sontimungan kimotosikal mantad Kota Kinabalu pakaayan id Sindumin, pogului pinapatahak do ‘baton’ kuminaa pogun doros Sarawak.
Ka disio, id potitikid watas pongumbayaan, pangaramitan tulun ngawi id labus jangkaan, om alansan kopio SPRM ilo otorimo di toinsanan tinan.
“Iti ponokotanda do ‘komitmen’ om sokodung potilombus tulun ngawi songkoiyonon sabaagi laang tokou manalasai kaparagatan susuap om kalasa momoguno kuasa,” ka disio mikuo minoboros do abaabayan dilo maan pohoroo sabaagi abaabayan tounan miampai tiyonon om ralan ih misusuai.